Një numër gjithnjë e më i madh universitetesh në SHBA po rikthejnë provimet me gojë si një mënyrë për t’u përballur me ndikimin e inteligjencës artificiale në arsim, sidomos nga mjete si ChatGPT.
Sipas pedagogëve, shumë detyra të shkruara dorëzohen pothuajse perfekte, por studentët shpesh nuk arrijnë t’i shpjegojnë ato. Për këtë arsye, disa profesorë po zëvendësojnë esetë dhe testet tradicionale me prezantime dhe mbrojtje me gojë, ku studentët duhet të argumentojnë punën e tyre pa ndihmë teknologjike.
Kjo metodë, që ka rrënjë që nga koha e Sokratit, konsiderohet më e vështirë për t’u manipuluar nga inteligjenca artificiale. Pedagogët theksojnë se provimet me gojë testojnë më mirë njohuritë reale dhe aftësinë për të menduar në moment.
Shqetësimi i tyre nuk lidhet vetëm me kopjimin, por edhe me rrezikun që studentët të humbasin aftësi të rëndësishme si kreativiteti dhe mendimi kritik, duke u mbështetur te përgjigjet e gatshme të AI.
Në disa universitete, si ai i Pensilvanisë, provimet me gojë po kombinohen me detyra të shkruara, duke i detyruar studentët jo vetëm të dorëzojnë punën, por edhe ta kuptojnë dhe ta shpjegojnë atë.
Ky ndryshim është pjesë e një tendence më të gjerë drejt vlerësimeve ballë për ballë, e cila nisi gjatë pandemisë për të kufizuar kopjimin online dhe u përforcua pas shfaqjes së ChatGPT në vitin 2022.
Disa institucione po testojnë edhe përdorimin e vetë inteligjencës artificiale për të zhvilluar provime me gojë, përmes sistemeve zanore që bëjnë pyetje në mënyrë dinamike.
Megjithatë, kjo qasje ka edhe vështirësi, pasi kërkon më shumë kohë dhe angazhim nga pedagogët dhe mund të jetë stresuese për studentët. Pavarësisht kësaj, shumë universitete e shohin si një hap të domosdoshëm për të ruajtur cilësinë e arsimit në epokën e AI.
