Bashkimi Europian po përballet me një presion në rritje mbi furnizimin me energji, ndërsa analiza të fundit tregojnë se rezervat strategjike të naftës mund të përballojnë krizën vetëm për një periudhë të kufizuar.
Sipas një analize të publikuar nga Euronews, rezervat emergjente të naftës në BE janë të mjaftueshme për të mbuluar rreth 90 ditë importe neto, ose rreth 61 ditë konsum real, duke nxjerrë në pah kufijtë e sistemit aktual të mbrojtjes energjetike.
Në një përpjekje për të përballuar krizën e shkaktuar nga tensionet në Lindjen e Mesme, vendet e BE kanë liruar tashmë rreth 92 milionë fuçi naftë nga rezervat, si pjesë e një ndërhyrjeje të koordinuar globale prej 400 milionë fuçish
Sipas ekspertëve, kjo sasi e hedhur në treg mund të zgjasë deri në 5 muaj, por vetëm si një mbështetje e përkohshme për konsumet aktuale që arrijnë në rreth 10.5 milionë fuçi në ditë në nivel europian
Ndërkohë, depozitat e brendshme të naftës në Europë, që arrijnë rreth 270 milionë fuçi, mjaftojnë vetëm për disa javë konsum, duke treguar se hapësira për manovrim është e kufizuar
Ekspertët paralajmërojnë se këto rezerva janë vetëm një “tampon” i përkohshëm dhe bëhen gjithnjë e më pak efektive me kalimin e kohës. Në skenarë të zgjatur krize, mungesa në treg mund të arrijë në miliona fuçi në ditë, duke rritur rrezikun për ndërprerje furnizimi dhe çmime edhe më të larta
Situata bëhet edhe më kritike për produkte si nafta dhe karburanti i avionëve, për të cilat Europa është më e varur nga importet nga Lindja e Mesme.
Në këto kushte, autoritetet europiane po shqyrtojnë mundësinë e lirimit të mëtejshëm të rezervave, ndërsa u bëjnë thirrje vendeve anëtare për koordinim dhe masa për uljen e konsumit.
Në thelb, të dhënat tregojnë qartë se edhe pse Europa ka një “jastëk sigurie” për krizën energjetike, ai është i përkohshëm dhe nuk garanton stabilitet afatgjatë nëse tensionet globale vazhdojnë. /euronews.com
