Kriza e karburantit të avionëve ka nisur të japë efektet e para në Europë, duke detyruar disa aeroporte italiane të vendosin kufizime në furnizim.
Masat janë aplikuar në katër aeroporte, Bologna, Milano Linate, Treviso dhe Venezia, ku për disa ditë pritet një shpërndarje e kufizuar e karburantit për fluturimet. Situata lidhet drejtpërdrejt me tensionet në Lindjen e Mesme dhe bllokimin e furnizimeve nga Gjiri Persik.
Operatori Air Bp Italia ka lëshuar një njoftim aeronautik për kompanitë ajrore, duke paralajmëruar se deri më 9 prill furnizimi me karburant do të jetë i kufizuar. Prioritet do të kenë fluturimet ambulancë, fluturimet shtetërore dhe ato me distancë mbi tre orë, ndërsa për pjesën tjetër do të aplikohet shpërndarje e kufizuar.
Sipas të dhënave, në aeroportet e Bologna dhe Venezia kufiri është rreth 2 mijë litra për fluturim, ndërsa në Treviso arrin në 2,500 litra. Situata më e ndjeshme paraqitet në Venezia, ku pilotëve u është rekomanduar të furnizohen me karburant përpara mbërritjes.
Në Milano Linate janë vendosur kufizime, por pa një tavan të qartë sasior. Në aeroportet e tjera italiane, deri tani nuk ka njoftime zyrtare për mungesë karburanti.
Autoritetet aeroportuale kanë tentuar të minimizojnë shqetësimin, duke theksuar se kufizimet lidhen me një furnizues të vetëm dhe se operatorë të tjerë vijojnë furnizimin normal.
Gjithashtu, është bërë e ditur se nuk ka kufizime për fluturimet ndërkontinentale dhe ato brenda zonës Schengen.
Megjithatë, zhvillimet në tregun global mbeten shqetësuese. Bllokimi i Ngushticës së Hormuzit ka ndërprerë një pjesë të madhe të furnizimit me naftë dhe produkte energjetike, duke rritur presionin mbi tregun europian.
Sipas vlerësimeve të industrisë, rreth 25 deri në 30 për qind e kërkesës europiane për karburant avionësh mbulohet nga Gjiri Persik, çka e bën kontinentin veçanërisht të ndjeshëm ndaj krizës.
Drejtues të kompanive ajrore kanë paralajmëruar se nëse konflikti vazhdon, mund të rrezikohen furnizimet në muajt në vijim dhe kostot do të reflektohen drejtpërdrejt në çmimet e biletave.
Situata po monitorohet nga afër, ndërsa zhvillimet në Lindjen e Mesme pritet të përcaktojnë nëse kufizimet aktuale janë të përkohshme apo fillimi i një krize më të thellë në transportin ajror europian. /skyweb.al
