Pas datës 10 prill, fluturimet në Europë mund të përballen me një fazë të re pasigurie, ndërsa furnizimet me karburant avioni nga Lindja e Mesme pritet të bien ndjeshëm.
Dërgesat e fundit nga rajoni i Gjirit janë në rrugë drejt Europës dhe konsiderohen si një “pikë kthese” për industrinë ajrore. Nëse situata në Ngushticën e Hormuzit vijon e bllokuar, furnizimi me karburant do të reduktohet, duke rritur rrezikun për ndërprerje operative në aeroportet europiane.
Shenjat e para janë dhënë tashmë në Itali, ku disa aeroporte kanë aplikuar kufizime në furnizim dhe kanë vendosur prioritete për fluturimet më të rëndësishme. Kjo tregon se problemi nuk është më teorik, por ka hyrë në fazë konkrete.
Ekspertët paralajmërojnë se pas 10 prillit, kompanitë ajrore mund të detyrohen të marrin masa të drejtpërdrejta, duke përfshirë reduktimin e frekuencave të fluturimeve, ndryshimin e orareve dhe rritjen e çmimeve të biletave. Në skenarin më të keq, disa linja mund të anulohen përkohësisht për shkak të mungesës së karburantit.
Ndryshe nga krizat e mëparshme, këtë herë problemi nuk lidhet vetëm me çmimin, por me vetë disponueshmërinë e karburantit. Aeroportet europiane nuk kanë kapacitete të mëdha magazinimi dhe varen nga furnizime të vazhdueshme, çka i bën ato të ndjeshme ndaj çdo ndërprerjeje.
Ndërkohë, përpjekjet për të kompensuar mungesën përmes importeve nga SHBA apo rritjes së prodhimit në rafineritë europiane janë në zhvillim, por nuk konsiderohen të mjaftueshme për të mbuluar plotësisht boshllëkun në afat të shkurtër.
Në këtë situatë, periudha pas 10 prillit shihet si moment vendimtar për industrinë ajrore në Europë. Nëse furnizimet nuk stabilizohen, vera mund të shoqërohet me më pak fluturime, kosto më të larta dhe një presion të shtuar mbi të gjithë sektorin e transportit ajror. /skyweb.al
