Shtrenjtimi i karburantit, që erdhi pas krizës në Lindjen e Mesme, me naftën që ka arritur në 224 lekë/litër nuk ka ndikuar shumë në ecurinë e inflacionit në muajin mars.
INSTAT bëri të ditur se ndryshimi vjetor i çmimeve të konsumit në mars ishte 2.6%, nga 2.5% që ishte ndryshimi vjetor në shkurt. Ky është niveli më i lartë në dy vjet, që nga shkurti i vitit 2022.
Ndikimin kryesor në inflacionin e shkurtit kanë vijuar ta japin qiratë, me 0.95 pikë përqindje. Transporti ka ndikuar me 0.48 pikë përqindje dhe ushqimet dhe pijet alkoolike me 0.44 pikë përqindje.
Në këtë nivel, inflacioni është poshtë objektivit të shënjestruar të Bankës së Shqipërisë prej 3%. Banka qendrore është përgjegjëse për ruajtjen e stabilitetit të çmimeve në vend dhe këtë e bën përmes normës bazë.
Nëse inflacioni kalon objektivin e bankës prej 3%, kjo e fundit rrit normën bazë. Rritja e normës bazë e bën huamarrjen më të shtrenjtë dhe frenon konsumin e investimet, duke ulur presionet mbi çmimet dhe duke ndihmuar në kontrollin e inflacionit.
Banka e Shqipërisë ka deklaruar së fundmi se ndonëse pasiguria në mjedisin ekonomik global mbetet e lartë, vendimmarrja për politikën monetare do të vijojë të mbështetet në analizën e të dhënave më të fundit ekonomike dhe financiare.
Në këtë kuadër, vendimet e Bankës së Shqipërisë do të synojnë ruajtjen e stabilitetit të çmimeve, duke qenë njëkohësisht në përputhje me kahun e politikës fiskale dhe zhvillimet në kursin e këmbimit.
Niveli më i lartë i inflacionit, në dekadat e fundit (përveç periudhës së vitit ’97, kur ishte kriza e piramidave) është shënuar në tetor 2022, kur arriti në 8.3%, ku ndikimin kryesor e dhanë ushqimet (5.1 pikë përqindje dhe transporti 1 pikë përqindje), si rrjedhojë e efektit zinxhir që shkaktuan sulmet e Rusisë ndaj Ukrainës në energji dhe produktet ushqimore.
Inflacioni në mars
Sipas njoftimit zyrtar të INSTAT, Norma e inflacionit e matur me Indeksin e Çmimeve të Konsumit (IÇK) në muajin Mars 2026 ishte 2,6 për qind, nga 2,1 për qind në Mars 2025.
Krahasuar me muajin Shkurt 2026, çmimet e konsumit u rritën me 0,7 për qind. Rritja vjetore e çmimeve në Mars 2026 u ndikua kryesisht nga grupi “Transporti” me 7,5%, pasuar nga “Qira, ujë, energji elektrike, gaz dhe karburante të tjera” me 4,8%, “Sigurime dhe shërbime financiare” me 4,5%, “Argëtim, sport dhe kulturë” me 2,9%, “Mobilje, pajisje shtëpie dhe mirëmbajtje e shtëpisë” me 2,6%, “Restorante dhe shërbime akomodimi“ me 2,4%, “Pije alkoolike dhe duhan” dhe “Kujdesi personal dhe mallra e shërbime të ndryshme” me 2,0% secili, “Shërbimi arsimor” me 1,9%, “Ushqime dhe pije joalkoolike” me 1,3%, etj.
Krahasuar me Shkurt 2026, rritja më e madhe e çmimeve vërehet në grupin “Transporti” me 7,1%, pasuar nga “Ushqime dhe pije joalkoolike” me 0,7%, “Mobilje, pajisje shtëpie dhe mirëmbajtje e shtëpisë” me 0,4%, “Argëtim, sport dhe kulturë” me 0,3%, “Shëndeti” dhe “Restorante dhe shërbime akomodimi“me 0,1% secili. Nga ana tjetër, çmimet e grupit “Veshje dhe këpucë” u ulën me 0,3%, pasuar nga grupet “Kujdesi personal dhe mallra e shërbime të ndryshme” me 0,2% dhe “Qira, ujë,
energji elektrike, gaz dhe karburante të tjera” me 0,1%.
Rritja vjetore e çmimeve në muajin Mars është ndikuar kryesisht nga grupi “Qira, ujë, energji elektrike, gaz dhe karburante të tjera” me +0,95 pikë përqindje, pasuar nga grupi “Transporti” me +0,48 pikë përqindje.
Gjithashtu, çmimet e grupit “Ushqime dhe pije joalkoolike” me +0,44 pikë përqindje, çmimet e grupit “Mobilje, pajisje shtëpie dhe mirëmbajtje e shtëpisë” me + 0,18 pikë përqindje, çmimet e grupit “Restorante dhe shërbime akomodimi” ndikuan me +0,13 pikë përqindje, çmimet e grupit “Pije alkoolike dhe duhan” me +0,10 pikë përqindje, çmimet e grupit “Kujdesi personal dhe mallra e shërbime të ndryshme” me +0,08 pikë përqindje, çmimet e grupit “Sigurime dhe shërbime financiare” me +0,07 pikë përqindje, çmimet e grupeve “Argëtim, sport dhe kulturë” dhe “Shërbimi arsimor” me +0,06 pikë përqindje secili, çmimet e grupeve “Shëndeti” dhe “Informacioni dhe komunikimi” me +0,02 pikë përqindje secili./Monitor
