Shqipëria po fiton gjithnjë e më shumë vëmendje si një destinacion i preferuar për të huajt, veçanërisht për shtetasit amerikanë, të cilët po e zgjedhin jo vetëm për pushime, por edhe për të jetuar.
Së fundmi, CNN Travel publikoi një artikull të autores Blane Bachelor me titull “Më shumë amerikanë po zhvendosen në Evropën Qendrore dhe Lindore”, ku një fokus i veçantë i kushtohet Shqipërisë dhe arsyeve të këtij trendi në rritje.
Sipas autores, për shumë vite ëndrra evropiane e amerikanëve lidhej me qytete si Parisi, Roma apo Barcelona. Megjithatë, rritja e kostove të jetesës dhe rregullat më të ashpra të vizave në këto vende po i shtyjnë ata të kërkojnë alternativa të reja në Ballkan.
Në këtë kontekst, Shqipëria po del në pah si një zgjedhje gjithnjë e më tërheqëse. Të dhënat nga Instituti i Statistikave të Shqipërisë tregojnë se në fund të vitit 2024 kishte rreth 22,000 të huaj me leje qëndrimi, mbi 3,000 prej të cilëve nga rajone si Amerika, Afrika dhe Oqeania, një rritje prej afro 25% krahasuar me vitin paraardhës.
Ndërkohë që vende si Italia, Spanja, Franca dhe Portugalia po forcojnë politikat e tyre të emigracionit, Shqipëria ofron një regjim shumë më të favorshëm për qytetarët amerikanë. Kjo e bën vendin tërheqës sidomos për ata që kërkojnë fleksibilitet dhe mundësi për të jetuar jashtë SHBA-së.
Jen Barnett, bashkëthemeluese e kompanisë Expatsi, e rendit Shqipërinë ndër destinacionet kryesore për zhvendosje. Ajo thekson se me rreth 1,000 dollarë në muaj mund të mbulohet një stil jetese i mirë, çka e bën vendin ideal për punë në distancë dhe fillimin e një biznesi. Sipas saj, pas një viti qëndrimi, aplikimi për një vizë si nomad digjital është relativisht i thjeshtë.
Edhe Blendi Gonxhja, ministër i Turizmit, Kulturës dhe Sportit, ka vlerësuar vëmendjen në rritje të mediave ndërkombëtare ndaj Shqipërisë, duke theksuar se vendi po bëhet gjithnjë e më i hapur dhe më i pranishëm në hartën globale për turistë, investitorë dhe profesionistë të pavarur.
Interesi i të huajve lidhet kryesisht me natyrën e paprekur, vijën e bukur bregdetare, koston e ulët të jetesës dhe mikpritjen tradicionale shqiptare. Qytete si Tirana, Saranda dhe Vlora janë ndër më të preferuarat, pasi ofrojnë një ndërthurje të jetës urbane, plazheve dhe trashëgimisë kulturore.
Përtej turizmit, po rritet edhe interesi për investime në pasuri të paluajtshme dhe zhvillim biznesi, duke reflektuar potencialin në rritje të tregut shqiptar dhe klimën e favorshme për sipërmarrje.
