Një zjarr i fuqishëm që përfshiu një pallat pranë QSUT në Tiranë ka lënë disa familje pa banesa, ndërsa autoritetet janë përqendruar fillimisht në menaxhimin e situatës dhe shuarjen e flakëve.
Prefekti i Tiranës, Shkëlqim Hajdari, deklaroi se menjëherë pas përfundimit të operacionit do të nisin hetimet për të zbardhur shkaqet e plota të ngjarjes.
I pyetur për fatin e familjeve që humbën shtëpitë dhe nëse do të kenë strehim për natën, ai u shpreh se kjo nuk ka qenë shqetësimi kryesor në këtë moment, duke theksuar se janë marrë masa paraprake.
“Kjo është një gjë që nuk më ka vënë shumë në preokupim, por kam urdhëruar bashkinë e Tiranës dhe emergjencat civile që ata do kenë mundësi të jenë në ambiente të tjera, por sigurisht jam i bindur që nuk do ketë nevojë. Ne jemi shqiptarë, kanë kushërinj, halla, daja… por ne jemi gati”, u shpreh Hajdari.
Deklarata e tij vjen në një moment kur familjet e prekura nga zjarri përballen me pasiguri për strehimin, ndërsa mbetet për t’u parë nëse institucionet do të ofrojnë zgjidhje konkrete për akomodimin e tyre në orët në vijim.
