Zjarri që përfshiu një pallat në zonën e njohur si “Farmacia 10” në Tiranë ka lënë pas dëme të konsiderueshme në disa dhjetëra apartamente.
Sipas të dhënave paraprake, rreth 30 apartamente janë prekur nga flakët që nisën në katin e parë të njërit prej bizneseve.
Bilanci i plotë i dëmeve pritet të dalë në orët në vijim, ndërsa deri tani raportohet se disa apartamente janë djegur plotësisht dhe të tjera kanë pësuar dëmtime më të lehta. Flakët janë përhapur me shpejtësi në fasadë, duke mbuluar të gjithë sipërfaqen e jashtme brenda pak minutash.
Dyshohet se zjarri mund të ketë nisur në një hapësirë të jashtme pranë objektit, ku mund të kenë qenë të depozituara mbeturina. Nuk është ende e qartë nëse pranë ka pasur ndonjë kuti të shpërndarjes së energjisë elektrike.
Banorët janë kapur të papërgatitur për shkak të përhapjes së shpejtë të flakëve. Sipas vlerësimeve paraprake, distanca mes burimit të zjarrit dhe fasadës ka qenë shumë e vogël, rreth një metër.
Nga verifikimet e para rezulton se fasada me dy shtresa është dëmtuar rëndë në pjesën e jashtme. Materiali i brendshëm izolues prej leshi xhami nuk është djegur, ndërsa është shkrumbuar plotësisht veshja e jashtme me ngjyrë të bardhë dhe pjesërisht ajo e kuqe.
Pamjet nga vendngjarja tregojnë ndërtesën e dëmtuar rëndë, me mbetje të djegura në këmbët e saj dhe tym që vijon të dalë edhe pas shuarjes së flakëve.
Aktualisht situata është vënë nën kontroll dhe nuk ka rrezik për riaktivizim apo përhapje të mëtejshme të zjarrit. /skyweb.al
