Volotea po ndryshon mënyrën si llogarit koston e biletës, duke e lidhur një pjesë të saj drejtpërdrejt me çmimin e karburantit.
Kompania ajrore low cost ka njoftuar se pasagjerët mund të paguajnë deri në 9 euro më shumë për çdo segment udhëtimi, në varësi të luhatjeve të tregut të naftës.
Sipas modelit të ri, shuma shtesë nuk fiksohet në momentin e blerjes së biletës, por përcaktohet shtatë ditë para nisjes.
Volotea e quan këtë mekanizëm “Fair Travel Promise” dhe argumenton se ai pasqyron më saktë koston reale të karburantit në tregjet ndërkombëtare.
Kjo do të thotë se kompania rezervon të drejtën të rishikojë çmimin e biletës pak para udhëtimit, duke shtuar një tarifë të ndryshueshme nëse çmimi i karburantit është rritur.
Në të kundërt, nëse nafta bie, pasagjeri mund të marrë një rimbursim me të njëjtën mënyrë pagese që ka përdorur gjatë blerjes.
Sipas shpjegimit të bërë publik, politika është e përfshirë në kushtet e transportit dhe u komunikohet klientëve gjatë procesit të rezervimit.
Me përfundimin e blerjes, pasagjeri autorizon kompaninë që të kryejë debitimin ose kreditimin e shumës përkatëse.
Volotea e lidh këtë vendim me situatën gjeopolitike në Lindjen e Mesme dhe me rritjen e presionit mbi kostot operative të linjave ajrore, sidomos për shkak të çmimit të kerozinës.
Në thelb, kompania po transferon një pjesë të rrezikut të tregut energjetik te vetë pasagjeri, në vend që ta përfshijë paraprakisht në tarifën bazë.
Pikëpyetja kryesore mbetet transparenca e këtij mekanizmi.
Nuk është e qartë se mbi çfarë niveli reference të çmimit të naftës ndërtohet tarifa bazë e biletës.
Pa këtë informacion, pasagjerët e kanë të vështirë të verifikojnë nëse shtesa apo rimbursimi pasqyron realisht lëvizjen e tregut.
Në praktikë, modeli i ri mund të hapë debat për mënyrën se si kompanitë low cost po menaxhojnë kostot në një periudhë pasigurie globale, duke zhvendosur gjithnjë e më shumë barrën financiare te konsumatori./skyweb.al
