Stresi nuk ndikon vetëm në gjendjen emocionale, por edhe në funksionimin e sistemit tretës. Specialistët shpjegojnë se ekziston një lidhje e fortë mes trurit dhe zorrëve, ndaj çdo gjendje ankthi apo tensioni mund të reflektohet drejtpërdrejt në tretje, duke shkaktuar fryrje barku dhe parehati.
Kur organizmi përjeton stres, ai kalon në një gjendje alarmi që ndikon në ritmin normal të tretjes. Ushqimi përpunohet më ngadalë, qëndron më gjatë në stomak dhe zorrë dhe kjo favorizon krijimin e gazrave. Në të njëjtën kohë, mund të shfaqen edhe çrregullime të tjera si kapsllëku, spazmat apo ndjeshmëria më e lartë ndaj ushqimeve të caktuara.
Kjo është një gjendje që mund të prekë këdo, edhe persona që nuk kanë pasur më parë probleme me tretjen, sidomos gjatë periudhave me ngarkesë të lartë emocionale apo lodhje.
Për të përballuar këtë shqetësim, ekspertët rekomandojnë që fillimisht të menaxhohet vetë stresi, përmes aktivitetit fizik, teknikave të relaksimit apo pushimit të mjaftueshëm. Po ashtu, ndihmon edhe mënyra e të ushqyerit, duke ngrënë me qetësi, duke përtypur mirë ushqimin dhe duke shmangur ngrënien në gjendje tensioni. Kufizimi i pijeve të gazuara dhe ushqimeve që krijojnë gazra, si dhe konsumimi i mjaftueshëm i ujit dhe fibrave, mund të lehtësojnë ndjeshëm simptomat.
Mjekët theksojnë se nëse fryrja bëhet e shpeshtë ose shoqërohet me shqetësime të tjera, është e rëndësishme të kërkohet këshilla e një specialisti për të përjashtuar probleme më serioze. Në thelb, kontrolli i stresit mbetet një element kyç jo vetëm për mirëqenien mendore, por edhe për shëndetin e sistemit tretës.
