Irani ka paralajmëruar se mund të mbyllë përsëri Ngushticën e Hormuzit nëse SHBA vazhdon bllokadën ndaj porteve iraniane.
Kryetari i parlamentit, Mohammad-Bagher Ghalibaf, shkroi në rrjetin social X se, nëse bllokada vazhdon, kjo rrugë strategjike nuk do të mbetet e hapur. Ai shtoi se lëvizja në këtë ngushticë, e cila është thelbësore për tregtinë globale të naftës dhe gazit, do të lejohet vetëm përmes një korridori të caktuar dhe me miratim nga Irani.
Pas disa javësh kufizimesh për shkak të konfliktit SHBA-Izrael kundër Iranit, autoritetet në Teheran deklaruan se gjatë armëpushimit anijet tregtare dhe cisternat e naftës mund të kalojnë sërish lirshëm.
Nga ana tjetër, presidenti amerikan Donald Trump konfirmoi rihapjen e ngushticës, por theksoi se bllokada detare amerikane do të vazhdojë, duke u aplikuar vetëm për anijet që hyjnë ose dalin nga Irani.
Deklarata e tij në platformën Truth Social, ku ai tha se bllokada do të mbetet në fuqi “deri në përfundimin e plotë të marrëveshjeve me Iranin”, shkaktoi reagime të forta në Teheran.
Zëdhënësi i Ministrisë së Jashtme iraniane, Esmail Baghaei, paralajmëroi se kjo masë përbën shkelje të armëpushimit dhe mund të sjellë një reagim nga Irani.
Ghalibaf theksoi gjithashtu se vendimet për hapjen ose mbylljen e ngushticës dhe rregullat që do të zbatohen nuk do të përcaktohen nga deklaratat në rrjetet sociale, por nga zhvillimet në terren. Ai akuzoi Trump për deklarata të pavërteta dhe shtoi se një qasje e tillë nuk do t’i ndihmojë SHBA-së në negociata./skyweb.al
