Bordi i Transparencës ka vendosur një tjetër rritje të çmimeve të karburanteve, duke shtuar presionin mbi konsumatorët. Sipas vendimit të miratuar më 22 prill 2026, çmimi i naftës është rritur me 5 lekë, ndërsa ai i benzinës me 4 lekë.
Duke nisur nga ora 12:30 e kësaj të mërkure, nafta do të tregtohet me jo më shumë se 202 lekë për litër në shitje me pakicë, ndërsa benzina me 176 lekë për litër. Për shitjen me shumicë, çmimi i gazoilit është përcaktuar në 190 lekë/litër, ndërsa i benzinës në 164 lekë/litër.
Vendimi hyn menjëherë në fuqi dhe do të mbetet në zbatim deri në mbledhjen e radhës së Bordit, ku pritet të reflektohen luhatjet e reja të tregut. Autoritetet u kanë rikujtuar operatorëve detyrimin për zbatimin e çmimeve të përcaktuara, duke paralajmëruar pezullim aktiviteti në rast shkeljesh.
Rritja vjen në një moment kur çmimet vijojnë të qëndrojnë nën kufijtë e përcaktuar nga akti normativ për akcizën. Sipas këtij akti, vetëm nëse nafta kalon mbi 220 lekë/litër dhe benzina mbi 200 lekë/litër, aplikohet ulja e akcizës në 80%. Me çmimet aktuale, niveli i akcizës mbetet i plotë, 100%.
Institucionet përgjegjëse kanë deklaruar se masa synon mbrojtjen e konsumatorëve dhe garantimin e konkurrencës së ndershme në treg, ndërsa zhvillimet e fundit tregojnë se tregu i karburanteve vijon të jetë i ekspozuar ndaj luhatjeve të vazhdueshme. /skyweb.al
