Kompanitë ajrore easyJet dhe easyJet holidays kanë konfirmuar se nuk do të aplikojnë tarifa shtesë për karburantin në fluturime apo paketa pushimi, pavarësisht pasigurive në tregun energjetik.
Në një njoftim zyrtar, kompania bën me dije se kjo politikë do të vlejë për të gjitha rezervimet ekzistuese, si edhe për çdo rezervim të ri për sezonin veror 2026.
Sipas easyJet, asnjë tarifë shtesë nuk do t’u ngarkohet klientëve, duke synuar t’u japë atyre më shumë siguri dhe qartësi në momentin e prenotimit të udhëtimeve.
Kompania thekson gjithashtu se aktualisht nuk ka ndërprerje në furnizimin me karburant për avionët dhe se të gjitha fluturimet dhe paketat turistike po operojnë normalisht.
Ky vendim vjen në një moment kur tregjet ndërkombëtare të energjisë po përballen me luhatje të forta, ndërsa disa kompani të tjera kanë paralajmëruar mundësinë e kostove shtesë për pasagjerët.
Megjithatë, easyJet ka zgjedhur të mbajë të pandryshuara çmimet për klientët, të paktën deri në përfundim të sezonit veror 2026, duke lënë të hapur pikëpyetje për periudhën pas këtij afati./skyweb.al
