Hipja të parët në avion për prindërit që udhëtojnë me fëmijë të vegjël shihet zakonisht si lehtësi, por një ish-stjuardesë ka ngritur një këndvështrim tjetër: sipas saj, kjo praktikë jo gjithmonë e bën udhëtimin më të qetë.
Në një video të publikuar në TikTok, ish-asistentja e fluturimit Laura, e cila në rrjetet sociale njihet si @laurainsouthflorida, shpjegon se prindërit me bebe ndoshta do të ishin më mirë të hipnin të fundit në avion, jo të parët.
Sipas saj, problemi kryesor është pritja e gjatë brenda avionit, përpara se fluturimi të nisë.
Laura tregon se kur udhëton me djalin e saj Oliver dhe hipën në fillim, fëmija përfundon i lidhur në ndenjëse për gati gjysmë ore, ndërsa pasagjerët e tjerë vazhdojnë të hyjnë ngadalë në bord.
Ajo thotë se pritja e gjatë e bën fëmijën më nervoz dhe shpesh streson edhe prindërit.
Laura thotë se një tjetër shqetësim është edhe sjellja e pasagjerëve që kalojnë pranë fëmijës, duke i bërë mimika apo gjeste sikur ai të ishte “një atraksion kopshti zoologjik”.
Sipas saj, kjo vetëm sa e shton tensionin para nisjes së fluturimit.
Këshilla e ish-stjuardesës është e thjeshtë: prindërit me fëmijë të vegjël të hipin të fundit, të ulen dhe të nisen menjëherë. Sipas saj, në këtë mënyrë fëmija nuk e ndien të njëjtën lodhje nga pritja.
Megjithatë, mendimi i saj ka hapur debat. Në më shumë se 4 mijë komente, shumë prindër kanë kundërshtuar këtë ide, duke theksuar se pre-imbarkimi është i domosdoshëm sidomos kur një prind udhëton vetëm dhe duhet të sistemojë karrocën, çantat, sediljen e fëmijës apo sende të tjera të nevojshme.
Sipas tyre, hipja në fillim u jep prindërve kohën e nevojshme për t’u organizuar pa presionin e pasagjerëve që presin në korridor.
Disa përdorues kanë propozuar edhe një zgjidhje të ndërmjetme: nëse udhëtojnë të dy prindërit, njëri mund të hipë më herët për të sistemuar bagazhet dhe pajisjet e fëmijës, ndërsa tjetri të qëndrojë me të voglin deri në fund dhe të hipë i fundit.
Në këtë mënyrë, fëmija mund të lëvizë më gjatë në terminal, të harxhojë energji dhe më pas të kalojë një fluturim më të qetë. /skyweb.al
