Administrata Tatimore u ka bërë thirrje të gjithë individëve dhe subjekteve që ushtrojnë aktivitet tregtar në internet të regjistrohen dhe të respektojnë detyrimet ligjore, duke paralajmëruar masa të forta ndaj atyre që operojnë në informalitet.
Sipas njoftimit zyrtar, çdo person fizik, i vetëpunësuar apo entitet që shet produkte apo ofron shërbime online është i detyruar të regjistrohet paraprakisht pranë Qendrës Kombëtare të Biznesit, njësoj si çdo aktivitet tjetër tregtar .
Ligji kërkon që këto subjekte të publikojnë në faqet e tyre të internetit të dhëna të detyrueshme, si numri i NIPT-it, emri i subjektit, adresa e selisë dhe numri i telefonit. Në rast se këto informacione mungojnë, Tatimet paralajmërojnë se do t’i kërkojnë Autoritetit të Komunikimeve Elektronike dhe Postare bllokimin e përkohshëm të faqes .
Institucioni thekson se bashkëpunimi me AKEP është forcuar për të rritur kontrollin mbi aktivitetet online dhe për të luftuar informalitetin, sidomos ndaj bizneseve që operojnë pa u regjistruar dhe pa deklaruar të ardhurat.
Përveç regjistrimit, subjektet që zhvillojnë tregti në internet duhet të përmbushin edhe një sërë detyrimesh tatimore, që përfshijnë pagesën e tatimit mbi të ardhurat, regjistrimin në TVSH nëse kalojnë pragun e xhiros, deklarimin e punonjësve dhe pagesën e kontributeve, si dhe fiskalizimin e faturave .
Administrata Tatimore sqaron se tregtia online përfshin çdo aktivitet shitjeje apo ofrimi shërbimesh përmes internetit, nga produktet fizike deri te shërbimet dixhitale si kurse, abonime apo bileta.
Në përfundim, Tatimet u bëjnë thirrje të gjithë operatorëve që të formalizojnë aktivitetin e tyre dhe të respektojnë ligjin, duke theksuar se në të kundërt do të përballen me masa administrative dhe bllokim të aktivitetit online. /skyweb.al
