Këshilli Mbikëqyrës i Banka e Shqipërisë vendosi të mbajë të pandryshuar normën bazë të interesit në nivelin 2.5%, ndërsa paralajmëroi se rritja e çmimeve të naftës në tregjet ndërkombëtare do të përkthehet në presione të reja inflacioniste në ekonominë shqiptare.
Guvernatori Gent Sejko deklaroi se shtrenjtimi i karburanteve dhe energjisë pritet të sjellë një rritje të përkohshme të inflacionit mbi objektiv gjatë vitit 2026, duke reflektuar transmetimin e drejtpërdrejtë të këtyre kostove në ekonomi.
“Rritja e çmimeve të naftës do të ketë ndikim të menjëhershëm në inflacion, duke e shtyrë atë përkohësisht mbi objektiv. Megjithatë, kjo rritje pritet të jetë e lehtë dhe kalimtare,” u shpreh Sejko.
Sipas Bankës së Shqipërisë, ndikimi i krizës së karburanteve do të jetë kryesisht afatshkurtër dhe nuk pritet të ndryshojë trajektoren afatmesme të ekonomisë.
Inflacioni pritet të rikthehet gradualisht drejt objektivit, pasi të zbuten efektet e goditjes së çmimeve dhe të stabilizohen tregjet ndërkombëtare.
Megjithatë, institucioni paralajmëron se pasiguritë mbeten të larta, sidomos për shkak të tensioneve gjeopolitike në Lindjen e Mesme, të cilat mund të zgjasin presionet mbi çmimet e energjisë dhe të ndikojnë negativisht në rritjen ekonomike.
Të dhënat tregojnë se inflacioni mesatar në tremujorin e parë të vitit 2026 arriti në 2.5%, me një rritje të lehtë krahasuar me periudhën paraardhëse.
Ky zhvillim u ndikua kryesisht nga shtrenjtimi i qirave dhe i naftës, ndërsa çmimet e ushqimeve dhe energjisë për familjarët mbetën më të stabilizuara.
Banka e Shqipërisë thekson se rritja e shpejtë e çmimeve të naftës në muajin mars dha sinjalin e parë të transmetimit të krizës në tregun vendas, duke pritur që ky efekt të vijojë edhe në muajt në vijim.
Në aspektin ekonomik, vendi vijon të shfaqë tregues pozitivë. Rritja e kërkesës ka nxitur punësimin dhe pagat, ndërsa norma e papunësisë ka zbritur në 8.3%, niveli më i ulët historik.
Megjithatë, ndikimi i krizës së karburanteve pritet të japë një efekt frenues, edhe pse të kufizuar, në ritmin e rritjes ekonomike gjatë vitit 2026.
Në këtë situatë, vendimi për të mbajtur normën e interesit të pandryshuar reflekton një qasje pritëse nga Banka e Shqipërisë, e cila synon të balancojë kontrollin e inflacionit me mbështetjen e aktivitetit ekonomik në një mjedis të paqëndrueshëm ndërkombëtar. /skyweb.al
