Çmimet e naftës pësuan rënie të fortë gjatë ditës së mërkurë, pasi raportime të fundit sugjerojnë se SHBA dhe Irani janë pranë një marrëveshjeje për t’i dhënë fund konfliktit që ka tronditur tregjet globale që nga fundi i muajit shkurt.
Referuar zhvillimeve në tregje, nafta amerikane WTI ra deri në 10% në orët e para të tregtimit, ndërsa më pas u stabilizua me rreth 8% rënie, duke u tregtuar në nivelin rreth 94 dollarë për fuçi. Në të njëjtën linjë, edhe nafta Brent, standardi ndërkombëtar, ra me rreth 7%, duke zbritur në rreth 102 dollarë për fuçi.
Rënia e fortë erdhi pas raportimeve se Uashingtoni dhe Teherani janë pranë një marrëveshjeje paraprake për t’i dhënë fund konfliktit, me mundësi konkretizimi brenda 48 orëve. Sipas të njëjtave burime, një nga pikat kyçe të marrëveshjes është rihapja graduale e ngushticës së Hormuzit, një nga arteriet më të rëndësishme të transportit të naftës në botë.
Reagimi i tregjeve ishte i menjëhershëm. Indekset kryesore në SHBA u rritën ndjeshëm, me Dow Jones që pritej të hapte me mbi 400 pikë plus, ndërsa Nasdaq shënoi rritje mbi 1%. Në të njëjtën kohë, yield-et e obligacioneve ranë, duke reflektuar pritshmëritë për ulje të tensioneve gjeopolitike.
Deklaratat politike shtuan më tej luhatjet. Presidenti amerikan paralajmëroi se ngushtica e Hormuzit mund të hapet për të gjithë, përfshirë Iranin, nëse arrihet marrëveshja, por në të kundërt kërcënoi me përshkallëzim të konfliktit.
Që nga nisja e përplasjes ushtarake, çmimet e naftës kanë qenë tepër të paqëndrueshme, duke u rritur ndjeshëm pas sulmeve ndaj Iranit dhe reagimit të këtij të fundit me mbylljen de facto të ngushticës së Hormuzit, përmes së cilës kalon një pjesë e konsiderueshme e furnizimit global me naftë dhe gaz të lëngshëm.
Shtrenjtimi i naftës në muajt e fundit ka pasur efekt zinxhir në ekonomi, duke rritur çmimet e karburanteve, kostot e transportit dhe biletat e avionëve për shkak të rritjes së çmimit të karburantit të aviacionit.
Zhvillimet e fundit tregojnë se tregjet e energjisë mbeten jashtëzakonisht të ndjeshme ndaj sinjaleve politike dhe gjeopolitike, ndërsa çdo hap drejt de-eskalimit reflektohet menjëherë në ulje çmimesh, ashtu si çdo përshkallëzim sjell rritje të menjëhershme. /skyweb.al
