Greqia po përgatitet të ashpërsojë rregullat për pagesat me para në dorë, në kuadër të një pakete më të gjerë masash që synojnë rritjen e transparencës financiare dhe luftën kundër evazionit fiskal.
Sipas projektligjit të paraqitur nga Ministria Greke e Ekonomisë Kombëtare dhe Financave, çdo transaksion me vlerë 500 euro ose më shumë duhet të kryhet në mënyrë elektronike.
Rregulli nuk do të llogaritet mbi fatura të veçanta apo pagesa të pjesshme, por mbi vlerën totale të transaksionit.
Kjo do të thotë se një pagesë nuk mund të ndahet në disa pjesë më të vogla për të shmangur kufirin e vendosur.
Masa synon të mbyllë hapësirat që deri tani lejonin qytetarët apo bizneset të anashkalonin kufizimet ekzistuese për përdorimin e parasë cash.
Autoritetet greke e lidhin këtë nismë me përpjekjet për të ulur informalitetin, për të forcuar kontrollin mbi qarkullimin e parasë dhe për të rritur përdorimin e pagesave bankare në ekonomi. /skyweb.al
