Kompania ajrore Emirates ka nisur zbatimin e një rregulli të ri për sigurinë në fluturime: pasagjerët mund të mbajnë vetëm një karikues portativ me kapacitet deri në 100 Wh, por nuk lejohet përdorimi apo karikimi i tij gjatë udhëtimit.
Çfarë parashikon rregulli i ri
- Lejohet vetëm një karikues portativ nën 100 Wh për person.
- Nuk mund të përdoret për të karikuar pajisje gjatë fluturimit.
- Nuk mund të vendoset në bagazhin e futur në barkun e avionit, por vetëm në bagazhin e dorës pranë pasagjerit.
- Pajisja duhet të ketë të shënuar qartë kapacitetin.
Emirates sqaron se çdo sedilje në avionët e saj është e pajisur me porta karikimi, ndaj pasagjerët mund të përdorin sistemin e bordit për telefonat, tabletët apo laptopët.
Rregulli erdhi pas rasteve të incidentëve me bateri litiumi në avionë të tjerë, që në disa raste kanë shkaktuar zjarr dhe ulje emergjente.
Sipas Emirates, kjo masë synon të parandalojë rreziqe të tilla dhe të garantojë sigurinë maksimale për udhëtarët.
Ekspertët e sigurisë e shohin këtë si një hap të domosdoshëm, por disa pasagjerë e konsiderojnë kufizues, sidomos në fluturimet e gjata ku përdorimi i karikuesve portativë është i zakonshëm.
Emirates është linja ajrore më e madhe që vendos këtë rregull dhe pritet që kompani të tjera ajrore të ndjekin të njëjtin model në muajt në vijim. /skyweb.al
