Të qenit prind shpesh lidhet me mungesën e gjumit dhe lodhjen e vazhdueshme. Megjithatë, studiuesit po rishikojnë idenë se prindërit kanë vuajtur gjithmonë nga pagjumësia në të njëjtën masë si sot, shkruan BBC.
Sipas disa studimeve në Gjermani, Francë dhe SHBA, prindërit humbasin një pjesë të gjumit pas lindjes së fëmijës, veçanërisht në muajt e parë. Nënat e reja në Gjermani, për shembull, flenë mesatarisht një orë më pak gjatë tre muajve të parë pas lindjes. Megjithatë, në afat më të gjatë, diferenca mes prindërve dhe njerëzve pa fëmijë rezulton relativisht e vogël.
Ekspertët theksojnë se problemi nuk është vetëm sasia e gjumit, por mënyra si e perceptojmë atë. Në shoqëritë moderne industriale, njerëzit presin të kenë gjumë të pandërprerë dhe “perfekt”, ndërsa në komunitetet tradicionale apo tek shoqëritë gjuetare-mbledhëse, zgjimet gjatë natës konsiderohen normale.
Antropologu evolucionar David Samson, i cili studioi komunitetin Hadza në Tanzani, zbuloi se edhe pse ata zgjohen shpesh gjatë natës, shumica janë të kënaqur me gjumin e tyre dhe nuk raportojnë lodhje të madhe.
Sipas studiuesve, lodhja e prindërve sot lidhet edhe me faktorë të tjerë: mungesa e mbështetjes familjare dhe komunitare, balancimi i punës me rritjen e fëmijëve dhe pritshmëritë e larta për gjumë “ideal”.
Ekspertët sugjerojnë se një qasje më fleksibile ndaj gjumit dhe pritshmërive mund t’i ndihmojë prindërit të ndihen më pak të rraskapitur në jetën e përditshme. /skyweb.al
