cja ndihmon shëndetin, por nuk e fshin plotësisht dëmin që shkakton qëndrimi i gjatë ulur.
Studimet e fundit tregojnë se ideja e 10 mijë hapave në ditë nuk ka lindur nga mjekësia, por nga marketingu japonez i viteve ’60. Megjithatë, kërkimet shkencore kanë konfirmuar se lëvizja e përditshme ka ndikim të rëndësishëm në uljen e rrezikut për sëmundje dhe vdekje të parakohshme.
Sipas të dhënave, përfitimet nisin që nga rreth 4,400 hapa në ditë, ndërsa efekti më i madh shëndetësor arrihet afërsisht te 7,500 hapa.
Por një studim i Brigham and Women’s Hospital dhe Vanderbilt University Medical Center tregon se ecja nuk mjafton gjithmonë për të kompensuar orët e gjata të qëndrimit ulur.
Studiuesit analizuan të dhënat e 15,327 të rriturve, të cilët mbanin pajisje Fitbit për matjen e hapave.
Mesatarisht, pjesëmarrësit bënin 7,416 hapa në ditë, por qëndronin ulur për 11.6 orë.
Rezultatet treguan se qëndrimi i gjatë ulur lidhej me një rrezik 15 deri në 66 për qind më të lartë për probleme si obeziteti, diabeti i tipit 2, hipertensioni, sëmundjet koronare, insuficienca kardiake, mëlçia e dhjamosur, sëmundjet e veshkave, COPD, depresioni, apnea e gjumit dhe fibrilacioni atrial.
Për disa probleme, shtimi i hapave ndihmonte ndjeshëm. Për shembull, obeziteti lidhej me nevojën për rreth 1,700 hapa shtesë në ditë, ndërsa hipertensioni, mëlçia e dhjamosur dhe insuficienca kardiake kërkonin deri në 8 mijë hapa shtesë për përmirësim të riskut.
Por për sëmundjet koronare dhe insuficiencën kardiake, rreziku nuk zhdukej plotësisht te personat që qëndronin ulur për 14 orë në ditë, pavarësisht numrit të hapave.
Një tjetër studim nga Universiteti i Sidneit, me mbi 72 mijë pjesëmarrës, arriti në përfundimin se 9 mijë deri në 10 mijë hapa në ditë lidhen me ulje 39 për qind të rrezikut të vdekshmërisë dhe 21 për qind të rrezikut për sëmundje kardiovaskulare.
Megjithatë, përfitime u panë edhe me 4 mijë deri në 4,500 hapa në ditë.
Mesazhi kryesor i studimeve është se çdo lëvizje ka vlerë, por ecja nuk duhet parë si “shlyerje” e dëmit nga qëndrimi i gjatë ulur.
Përveç hapave, ekspertët këshillojnë ndërprerjen e shpeshtë të qëndrimit në karrige, me lëvizje të shkurtra gjatë ditës. /skyweb.al
