Neandertalët mund të kenë kryer ndërhyrjen e parë dentare 59 mijë vjet më parë

Dhëmbi, i quajtur “Chagyrskaya 64”, u zbulua në Shpellën Chagryskaya në malet Altai të Rusisë. Ai kishte një vrimë të thellë që arrinte deri te pjesa e brendshme e dhëmbit, ku ndodhen nervat dhe enët e gjakut, duke treguar se personi vuante nga një infeksion i dhimbshëm.

Shkencëtarët vunë re edhe gërvishtje rreth vrimës, të cilat sugjeronin përdorimin e një vegle për të pastruar kavitetin. Pas analizave dhe eksperimenteve me dhëmbë modernë, studiuesit arritën në përfundimin se Neandertalët kishin përdorur vegla guri për të “shpuar” dhe pastruar dhëmbin, në atë që konsiderohet ndërhyrja më e hershme dentare e njohur në historinë njerëzore.

Eksperimentet treguan se me mjete të mprehta prej guri jasperi, kaviteti mund të pastrohej brenda më pak se një ore. Sipas studiuesve, kjo procedurë mund të ketë lehtësuar dhimbjen duke dëmtuar nervat e infektuar në brendësi të dhëmbit.

Zbulimi tregon se Neandertalët jo vetëm kujdeseshin për njëri-tjetrin, por mund të kishin edhe njohuri primitive mjekësore për trajtimin e problemeve shëndetësore. /skyweb.al