Përplasja mes kompanive të lidhura me biznesmenët Behgjet Pacolli dhe Valon Ademi duket se po thellon krizën në aeroportin e Vlorës, projekt që konsiderohej si aeroporti i dytë ndërkombëtar më i rëndësishëm në vend dhe një nga investimet kyçe për turizmin shqiptar.
Situata u tensionua ditën e sotme, pasi dhjetëra punonjës të kompanisë MABCO dhe nënkontraktorëve të saj nuk u lejuan të hynin në ambientet e aeroportit të Vlorës, megjithëse ishin paraqitur normalisht në punë.
Sipas burimeve, punonjësit ishin telefonuar që mbrëmjen e kaluar dhe ishin njoftuar të mos paraqiteshin në punë ditën e sotme. Megjithatë, për shkak se nuk kishte një komunikim zyrtar apo dokument zyrtar për pezullimin e aktivitetit, ata janë paraqitur në ambientet e aeroportit, por janë ndaluar të hyjnë brenda.
Bëhet fjalë për punonjës që operojnë në terminal, në ambientet e jashtme të aeroportit dhe në sektorin zjarrfikës.
Përfaqësues të kompanisë së lidhur me Behgjet Pacollin pretendojnë se ndalimi i punonjësve është bërë në mënyrë të padrejtë dhe jashtëligjshme. Sipas tyre, nuk ka asnjë njoftim zyrtar për ndërprerje punimesh apo ndryshim të situatës kontraktuale.
Ismet Pacolli deklaron se çështja ndodhet në gjykatë dhe se është drejtësia ajo që duhet të vendosë për vijimin e punimeve dhe raportin mes palëve.
Sipas tyre, ka qenë kompania 2A Group ajo që ka ndaluar hyrjen e punonjësve në ambientet e aeroportit.
Nga ana tjetër, kompania MABCO pretendon se punimet duhet të vazhdojnë për shkak të situacioneve teknike dhe procedurale që duhet të mbyllen në kantier.
Përplasja mes palëve vijon prej tetorit të vitit të kaluar dhe duket se konflikti ka sjellë pasoja direkte për projektin e aeroportit të Vlorës, i cili synohej të ishte operacional gjatë këtij sezoni veror.
Sipas afateve kontraktuale, kompanitë që po përballen me bllokimin e aktivitetit kishin afat deri në fund të muajit maj për përfundimin e punimeve, me të drejtë shtyrjeje edhe për tre muaj të tjerë. Kjo do të thotë se gushti konsiderohet afati final për mbylljen e projektit.
Megjithatë, zhvillimet e fundit kanë shtuar pikëpyetjet nëse aeroporti do të arrijë të hapet brenda këtij viti, ndërsa vonesat po konsiderohen si një goditje për strategjinë turistike të jugut të Shqipërisë.
Aeroporti i Vlorës shihej si një nga projektet më të rëndësishme për të rritur flukset turistike dhe për të lehtësuar ngarkesën e aeroportit të Rinasit gjatë sezonit veror.
