Një studim i ri i realizuar në Francë ka ngritur shqetësime mbi ndikimin që disa konservues ushqimorë mund të kenë në shëndetin e zemrës. Sipas kërkimit, aditivët që përdoren për të parandaluar bakteret dhe mykun në ushqimet e përpunuara lidhen me një rrezik më të lartë për tension të lartë të gjakut, infarkt dhe goditje në tru.
Studiuesit analizuan të dhënat e mbi 112 mijë personave dhe zbuluan se konsumimi i shpeshtë i disa konservuesve shoqërohej me 29% më shumë rrezik për hipertension dhe 16% më shumë gjasa për probleme serioze kardiovaskulare. Mes përbërësve më problematikë u identifikuan nitriti i natriumit, sorbati i kaliumit dhe metabisulfiti i kaliumit, të përdorur zakonisht në mishrat e përpunuar, salcat, djathërat dhe pijet industriale.
Ekspertët theksojnë se edhe disa konservues të konsideruar “natyralë”, si acidi citrik dhe acidi askorbik, mund të kenë efekte të ndryshme kur përdoren si aditivë në ushqime të përpunuara. Megjithatë, ata sqarojnë se kjo nuk lidhet me vitaminën C apo acidet që gjenden natyrshëm te frutat dhe perimet.
Sipas specialistëve, ushqimet ultra të përpunuara prej kohësh lidhen me probleme si obeziteti, diabeti dhe sëmundjet e zemrës. Ata rekomandojnë konsumimin e ushqimeve të freskëta, gatimet në shtëpi dhe reduktimin e mishrave të përpunuar dhe produkteve industriale për të ulur ekspozimin ndaj këtyre përbërësve. /skyweb.al
