Në një kohë kur ritmi i përditshëm është i mbushur me nxitim, njoftime, detyrime dhe presion për produktivitet, një trend i ri po rikthen vëmendjen te vlera e pushimit të thjeshtë. Quhet “dimanche à la française”, ose e diela në stilin francez, dhe në thelb nënkupton një ditë pa orar, pa faj dhe pa presion.
Koncepti është i thjeshtë: e diela nuk duhet të jetë vetëm paradhoma e së hënës, por një ditë që rrjedh ngadalë. Pa lista detyrash, pa email, pa angazhime të panevojshme dhe pa ndjesinë se çdo orë duhet të jetë e mbushur me diçka të dobishme.
Në kulturën franceze, e diela tradicionalisht shihet si një ditë pothuajse e shenjtë për qetësi, ecje, ushqim të mirë dhe kohë për veten. Një nga fjalët që e përshkruan më mirë këtë mënyrë jetese është “flâner”, që do të thotë të ecësh pa destinacion të caktuar, duke vëzhguar qytetin, njerëzit dhe momentin, pa nxitim dhe pa qëllim praktik.
Kjo qasje nuk synon të të bëjë më produktiv. Përkundrazi, të kujton se ndalimi është i nevojshëm. Në një shoqëri ku pushimi shpesh shihet si humbje kohe, e diela franceze e vendos qetësinë në qendër të ditës.
Thelbi i këtij trendi nuk lidhet me luksin klasik apo me nevojën për të pasur shumë para. Nuk kërkon një mëngjes perfekt, një shtëpi të kuruar për fotografi apo një fundjavë të organizuar si skenë filmi. Mjafton të zgjohesh pa alarm, të pish kafen ngadalë, të lexosh disa faqe libri, të dalësh për një shëtitje ose të hash pa u nxituar.
Edhe studimet mbështesin rëndësinë e një fundjave më të ngadaltë. Sipas një studimi të publikuar në “Journal of Occupational Health Psychology”, shkëputja nga përgjegjësitë gjatë fundjavës lidhet me më pak lodhje, gjumë më cilësor dhe më shumë energji në fillim të javës. Pjesëmarrësit në studim raportuan se ndiheshin më pak të lodhur dhe më të qartë mendërisht të hënën.
Për të krijuar një të diel në stilin francez, nuk duhen rregulla të mëdha. Ideja është të flesh mjaftueshëm, të mos vendosësh alarm, të mos e nisësh ditën me lista detyrash dhe të lejosh trupin të vendosë ritmin e vet.
Kafeja mund të pihet më ngadalë, dushi mund të zgjasë pak më shumë, telefoni mund të përdoret më pak dhe ushqimi mund të shijohet pa nxitim. Një shëtitje pa destinacion, një libër, muzikë, pak kujdes për trupin ose thjesht disa orë pa bërë asgjë janë pjesë e së njëjtës filozofi.
“Dimanche à la française” është në fund një kujtesë e thjeshtë: fundjava nuk duhet të shërbejë vetëm për të rikuperuar lodhjen e javës apo për t’u përgatitur për të hënën. Ajo mund të jetë edhe një hapësirë për të ndalur, për të marrë frymë dhe për t’u rikthyer te vetja. /skyweb.al
