Bashkimi Evropian ka rritur presionin ndaj kompanisë Meta, duke kërkuar ndryshime në disa prej funksioneve të Facebookut dhe Instagramit, të cilat sipas Komisionit Evropian nxisin përdorimin e tepërt të rrjeteve sociale dhe mund të krijojnë varësi, veçanërisht te të miturit dhe përdoruesit më të cenueshëm.
Sipas vlerësimit paraprak të Komisionit, Meta nuk ka identifikuar dhe kufizuar në mënyrë të mjaftueshme rreziqet që lidhen me veçori si rrjedha e pafund e postimeve, rekomandimet tepër të personalizuara dhe nisja automatike e videove.
Brukseli argumenton se këto mekanizma janë projektuar për t’i mbajtur përdoruesit sa më gjatë në platforma, duke rritur kështu të ardhurat nga reklamat. Sipas autoriteteve evropiane, këto funksione e shtyjnë përdoruesin të vazhdojë të konsumojë përmbajtje pa ndërprerje, duke e futur trurin në një gjendje “pilotimi automatik”, gjë që mund të çojë në zakone të dëmshme dhe sjellje kompulsive.
Komisioni Evropian ka shprehur shqetësime edhe për kontrollet prindërore në Facebook dhe Instagram, të cilat i konsideron tepër të ndërlikuara. Po ashtu, sipas tij, mjetet që synojnë të kufizojnë kohën e përdorimit të rrjeteve sociale nga adoleshentët nuk janë mjaftueshëm efektive.
Meta i ka kundërshtuar këto konstatime paraprake. Një zëdhënës i kompanisë deklaroi se vlerësimi i Komisionit nuk pasqyron masat e rëndësishme që janë ndërmarrë për mbrojtjen e të rinjve në platformat e saj.
Kompania theksoi se llogaritë e dedikuara për adoleshentët, të prezantuara dy vjet më parë, u japin prindërve mundësinë të bllokojnë përdorimin e Instagramit gjatë natës dhe të vendosin kufij për kohën ditore të ekranit.
Këto përfundime paraprake janë pjesë e hetimit të nisur nga Komisioni Evropian në maj të vitit 2024, ku Meta dyshohet se nuk ka ndërmarrë masa të mjaftueshme për mbrojtjen e të miturve në internet.
Nëse kompania nuk respekton kërkesat e Bashkimit Evropian dhe konstatohen shkelje të rregullave, ajo mund të përballet me gjoba të konsiderueshme.
