Gjykata e Lartë pritet të shqyrtojë sot rekursin e Erion Veliajt kundër masës së sigurisë “arrest me burg”.
Pas vendimit unifikues të Kolegjeve të Bashkuara, mundësia për ndryshimin e masës së sigurisë është rritur, pasi arresti me burg duhet të vendoset vetëm kur gjykata arsyeton se asnjë masë tjetër nuk është e përshtatshme.
Sipas këtij standardi, gjykata duhet të analizojë nëse ka rrezik real që personi nën hetim të largohet, të ndikojë mbi provat, të frikësojë dëshmitarët apo të pengojë hetimin. Po ashtu, duhet të merren në konsideratë edhe rrethanat personale, familjare dhe sociale.
Pikërisht mbi këtë bazë, Veliaj kërkon ndryshimin e masës së sigurisë dhe lirimin nga qelia e paraburgimit.
Vendimi i sotëm pritet me interes, pasi Gjykata e Lartë do të duhet të arsyetojë nëse në rastin konkret arresti me burg është masa e vetme e përshtatshme.
Çështja ka edhe peshë politike, pasi një ndryshim i masës dhe rikthimi i mundshëm i Veliajt në Bashkinë e Tiranës do të ndikonte drejtpërdrejt në zhvillimet brenda kampit socialist.
