Një klasë e re ilaçesh për uljen e kolesterolit po shihet si një nga zhvillimet më premtuese në luftën kundër infarkteve dhe goditjeve në tru, duke synuar një grimcë të zakonshme në gjak që prej dekadash ka qenë e vështirë të trajtohet.
Sipas Wall Street Journal, studiuesit mund të kenë që këtë verë rezultatet përfundimtare të provës klinike të ilaçit eksperimental më të avancuar, i zhvilluar nga Novartis në bashkëpunim me Ionis Pharmaceuticals.
Studimi po vlerëson nëse ilaçi arrin të reduktojë rrezikun e infarkteve, goditjeve në tru dhe vdekjeve tek pacientët me rrezik të lartë kardiovaskular. Nëse rezultatet rezultojnë pozitive, kompanitë mund të kërkojnë miratimin zyrtar të trajtimit që vitin e ardhshëm.
Kompanitë farmaceutike kanë investuar prej vitesh në kërkime për të synuar lipoproteinën(a), një grimcë yndyrore në gjak e lidhur me rritjen e rrezikut për sëmundje të zemrës. Ndryshe nga kolesteroli tradicional LDL, kjo grimcë ka qenë shumë më e vështirë për t’u ulur me terapitë ekzistuese.
Ekspertët e konsiderojnë këtë zhvillim si potencialisht revolucionar për miliona pacientë në mbarë botën që mbeten të rrezikuar nga problemet kardiovaskulare pavarësisht trajtimeve aktuale./skywe.al
