Shoqëria MABCO Constructions S.A. ka reaguar pas ultimatumit të Ministrisë së Infrastrukturës dhe Energjisë për zgjidhjen brenda 30 ditësh të konfliktit mes ortakëve të Aeroportit Ndërkombëtar të Vlorës.
Në një deklaratë publike, kompania shprehet se është e gatshme të marrë pjesë në çdo proces dialogu, koordinimi apo ndërmjetësimi të iniciuar nga ministria, por thekson se çdo hap i mëtejshëm duhet të bazohet në vendimin e fundit të Gjykatës së Lartë.
Sipas MABCO-s, ky vendim ka rrëzuar masat e sigurimit që kufizonin ushtrimin e të drejtave të saj si ortak mazhoritar në shoqërinë koncesionare “Vlora International Airport” sh.p.k.
Kompania thotë se vendimi ka rikthyer situatën juridike në përputhje me statusin ligjor dhe korporativ të palëve dhe se MABCO mbetet zotëruese e 98 për qind të kuotave të VIA-s, sipas të dhënave të regjistruara dhe të vlefshme ligjërisht.
“MABCO mirëpret çdo iniciativë institucionale që synon rikthimin e normalitetit në funksionimin e shoqërisë koncesionare dhe përfundimin sa më të shpejtë të një projekti me rëndësi strategjike për Republikën e Shqipërisë”, thuhet në deklaratë.
Kompania shton se gjatë periudhës tetor 2025 deri në maj 2026 ka ngritur vazhdimisht shqetësime pranë institucioneve shtetërore lidhur me kufizimin e të drejtave të saj si ortak mazhoritar dhe pasojat që kjo situatë mund të sillte për ecurinë e projektit.
Sipas saj, gjatë kësaj periudhe janë depozituar dhjetëra shkresa dhe kërkesa zyrtare, me qëllim mbrojtjen e interesit të projektit dhe shmangien e vonesave të mëtejshme.
Pas vendimit të Gjykatës së Lartë, MABCO thotë se prioriteti nuk është rikthimi në debatet e së kaluarës, por normalizimi i funksionimit të shoqërisë koncesionare dhe përshpejtimi i proceseve që lidhen me përfundimin, testimin, certifikimin dhe vënien në operim të aeroportit.
Në këtë kuadër, kompania deklaron se ka ndërmarrë hapat e nevojshëm për rikthimin e normalitetit korporativ në VIA, përfshirë thirrjen e organeve vendimmarrëse të shoqërisë në përputhje me statutin dhe legjislacionin shqiptar.
Megjithatë, MABCO rendit disa kushte që, sipas saj, duhet të jenë bazë për çdo proces dialogu apo ndërmjetësimi. Këto përfshijnë respektimin e plotë të vendimit të Gjykatës së Lartë dhe të të drejtave që burojnë prej tij, garantimin e aksesit të plotë dhe të pakufizuar të përfaqësuesve, specialistëve, punonjësve dhe nënkontraktorëve të saj në projekt, si dhe mundësimin e aksesit në informacionin teknik, administrativ dhe financiar të nevojshëm për vlerësimin e gjendjes aktuale të aeroportit.
Kompania kërkon gjithashtu që proceset e mëtejshme të zhvillohen në përputhje me kontratën e koncesionit, statutin e VIA-s dhe legjislacionin shqiptar.
“MABCO mbetet e përkushtuar ndaj një qëllimi të vetëm: përfundimit me sukses të Aeroportit Ndërkombëtar të Vlorës, certifikimit të tij sipas standardeve ndërkombëtare dhe vënies në operim në interes të qytetarëve të Republikës së Shqipërisë”, thuhet në deklaratë.
Reagimi i MABCO-s vjen pas shkresës së Ministrisë së Infrastrukturës dhe Energjisë, e cila u kërkoi palëve të nisin një proces për zgjidhjen e mosmarrëveshjeve lidhur me projektin e aeroportit.
Ministria ka paralajmëruar se, në rast se palët nuk arrijnë të zgjidhin konfliktin brenda 30 ditëve, shteti do të ushtrojë të gjitha të drejtat që i njeh kontrata e koncesionit dhe legjislacioni në fuqi për mbrojtjen e interesit publik.
Në fund të reagimit, MABCO deklaron se rezervon të gjitha të drejtat që rrjedhin nga kontrata e koncesionit, legjislacioni shqiptar dhe instrumentet ndërkombëtare të mbrojtjes së investimeve. /skyweb.al
