Kryeministri Edi Rama reagoi sot për protestën dhe zhvillimet e fundit në Zvërnec, duke theksuar rëndësinë që sipas tij kanë projektet e mëdha të investimeve të huaja për ekonominë shqiptare.
Gjatë fjalës së tij, Rama tha se investime të tilla mund të sjellin ndikim të rëndësishëm në zhvillimin e vendit, veçanërisht në sektorin e turizmit elitar.
Kreu i qeverisë u ndal te marrëveshjet me marka ndërkombëtare luksoze, duke përmendur “AMAN Hotel” dhe “Cheval Blanc”, për të cilat tha se janë pjesë e planit të investitorëve për projektin në Vlorë.
“Dhe po ju them dhe këtë, sot që flasim, investitorët kanë marrëveshje me ‘AMAN Hotel’, ‘Cheval Blanc’, është brandi më ekskluziv sot, i cili është në Paris, është në Venecia, do vijë dhe në Vlorë, nëse së bashku do t’ia sigurojmë mirëseardhjen”, tha Rama.
Kryeministri paralajmëroi se pengesat ndaj projekteve të tilla mund të sjellin pasoja ekonomike, duke e krahasuar situatën me zhvillimet në Mal të Zi dhe projektin Porto Montenegro.
“Nëse do vazhdoni dhe ca ditë kështu, atëherë e dini çfarë do ndodhë? Do ndodhë tragjedia e Porto Montenegros, po në përmasa të kësaj kohe”, u shpreh ai.
Rama tha se Porto Montenegro, sipas tij, ndryshoi fatin ekonomik të Malit të Zi, ndërsa shtoi se investitori që e zhvilloi atë projekt kishte shfaqur më parë interes për Shqipërinë.
“Porto Montenegro që bëri fatin e Malit të Zi u ndërtua nga dikush që u sorollat nëpër Shqipëri me vite dhe ‘e hidhnin dhe e prisnin’. Donte të bënte portin e Durrësit dhe vajti në Mal të Zi”, tha kryeministri.
Sipas Ramës, investime të tilla kanë ndikuar që Mali i Zi të ketë sot paga dhe të ardhura për frymë më të larta në rajon.
“Sot Mali i Zi i ka pagat më të larta dhe të ardhurat për frymë më të lartat në këtë rajon, falë atyre investimeve që nuk pati frikë t’i bëjë dhe që nuk ua vuri ‘shqelmin në fyt’ investitorëve”, deklaroi ai.
Kryeministri tha se Shqipëria duhet të vendosë nëse do të mbetet pas Malit të Zi apo do të përpiqet ta kalojë atë përmes projekteve të mëdha të investimeve të huaja.
“Çfarë do zgjedhim? Do zgjedhim të rrimë ta shikojmë akoma Malin e Zi nga prapa apo do zgjedhim që të parakalojmë edhe Malin e Zi dhe të tjerët që janë të shqetësuar për këtë projekt? Si do ta bëjmë këtë zgjedhje?”, tha Rama.
Deklarata e kryeministrit vjen pas debatit publik për projektin në Zvërnec, protestave të zhvilluara në zonë dhe përplasjeve mbi mënyrën se si po trajtohen investimet e mëdha turistike në bregdet.
