Po zhvillohet sot Konkursi Ndërkombëtar për Rikualifikimin e Pallatit të Kongreseve, ku i pranishëm është edhe kryeministri Edi Rama. Pesë skuadrat finaliste prezantojnë përpara jurisë projekt-idetë e tyre arkitekturore.
Rama u shpreh se përzgjedhja e pesë finalistëve ka qenë një proces i vështirë për shkak të nivelit të lartë të pjesëmarrjes dhe cilësisë së projekteve.
“Atëherë, sot që flasim, bashkë me këtë konkurs jemi në 15 konkurse të realizuara ndërkombëtare. Kemi 3 konkurse që janë duke u përgatitur. Të gjitha konkurset janë të standardeve më të larta ndërkombëtare, jo vetëm për nga pjesëmarrja e arkitektëve më të mirënjohur të botës së sotme, jo vetëm nga juria ndërkombëtare, por edhe nga procedurat e ndjekura. Janë aktualisht 12 kontrata të lidhura, 7 në proces, 3 masterplane dhe janë 20 projekte publike për zhvillim.
I gjithë thelbi i Koorporatës Shqiptare të Investimeve është që, duke vënë në dispozicion prona shtetërore të degraduara ose në nevojë për zhvillim, të marrë mbrapsht përfitime financiare në funksion të publikut dhe nevojave të institucioneve publike. Dhe përfitueshmëria e koorporatës është e kuantifikuar në kontratat e lidhura në mbi gjysmë miliardi euro, në përfitim direkt të shtetit nga ky aktivitet, ndërkohë përfitueshmëria ekonomike e kontraktuar është mbi 1 miliard euro.”, tha Rama. /skyweb.al
