Numri i milionerëve në botë dhe pasuria e tyre arritën nivele rekord gjatë vitit 2025, të mbështetur kryesisht nga ecuria pozitive e tregjeve të aksioneve, rënia e inflacionit dhe interesi i madh i investitorëve për kompanitë e lidhura me inteligjencën artificiale.
Sipas raportit “World Wealth Report” të Capgemini, numri i personave me më shumë se 1 milion dollarë pasuri të investueshme u rrit me 7.9 për qind gjatë vitit të kaluar, duke arritur në 25.3 milionë. Kjo do të thotë se në botë u shtuan gati 2 milionë milionerë krahasuar me vitin 2024.
Capgemini i përkufizon si milionerë personat që kanë mbi 1 milion dollarë pasuri të investueshme, pa përfshirë zakonisht banesën kryesore.
Pasuria totale e kësaj kategorie u rrit me 8.7 për qind, duke arritur në 98.3 trilionë dollarë. Ky është niveli më i lartë i regjistruar ndonjëherë dhe njëkohësisht rritja më e fortë vjetore që nga viti 2018.
Sipas raportit, tregjet e aksioneve ishin motori kryesor i krijimit të pasurisë në pesë nga gjashtë rajonet kryesore të analizuara. Rritja e bursave u ndikua ndjeshëm nga pritshmëritë e lidhura me inteligjencën artificiale, e cila gjatë vitit 2025 vijoi të tërheqë kapital të madh në kompani teknologjike dhe sektorë të lidhur me inovacionin.
Megjithatë, pasuria mbetet shumë e përqendruar. Sipas Capgemini, 1 për qind e më të pasurve zotëron 34.8 për qind të gjithë pasurisë së milionerëve në nivel global.
Në Shtetet e Bashkuara, tregjet financiare u mbështetën nga ulja e normave të interesit nga banka qendrore amerikane dhe nga entuziazmi për inteligjencën artificiale. Indekset kryesore të Wall Street u rritën me 13 deri në 20 për qind gjatë vitit.
Në Europë, investitorët u orientuan veçanërisht drejt industrisë së mbrojtjes dhe planit të madh të investimeve publike të premtuar nga Gjermania. Bursa e Frankfurtit u rrit me 23.01 për qind, Parisi me 10.41 për qind, Milano me 31.46 për qind dhe Londra me 21.51 për qind.
Rritja më e madhe e numrit të milionerëve u regjistrua në rajonin e Azisë dhe Paqësorit, me 9.4 për qind. Kjo rritje u mbështet kryesisht nga sektori i gjysmëpërçuesve, me Japoninë dhe Kinën në krye.
Në Amerikën e Veriut, numri i milionerëve u rrit me 9.1 për qind, falë kryesisht Shteteve të Bashkuara. SHBA regjistroi shtimin më të madh në shifra absolute, me 736 mijë milionerë të rinj. Numri i tyre në vend arriti në 8.7 milionë, me një rritje prej 9.2 për qind.
Pas rënies së vitit 2024, Europa shënoi një rritje prej 6.5 për qind të numrit të milionerëve. Luksemburgu kryesoi me rritje 13.5 për qind, i ndjekur nga Gjermania me 11.1 për qind. Franca pati një rritje më të ngadaltë, me 2.7 për qind.
Edhe Afrika dhe Amerika Latine shënuan rritje, përkatësisht me 4.1 për qind dhe 0.3 për qind. Lindja e Mesme ishte rajoni i vetëm ku numri i milionerëve ra, me 1.4 për qind, kryesisht për shkak të uljes së çmimeve të naftës.
Rritje e fortë u regjistrua edhe te kategoria e ultra të pasurve, pra personat me të paktën 30 milionë dollarë pasuri. Numri i tyre u rrit me 9.4 për qind, duke arritur në rreth 250 mijë persona, ndërsa pasuria e tyre u rrit me 9.7 për qind.
Studimi i Capgemini u bazua në anketimin e 6,510 individëve të pasur në Amerikë, Europë, rajonin e Azisë dhe Paqësorit, si dhe në Lindjen e Mesme, gjatë muajit janar.
