Kompania ajrore me kosto të ulët Ryanair është vënë nën hetim nga autoriteti britanik i konkurrencës dhe tregjeve (CMA) për tarifat që u vendos familjeve me fëmijë të vegjël për të siguruar vende pranë njëri-tjetrit gjatë fluturimeve.
Sipas CMA, pasagjerët e Ryanair nuk janë të detyruar të paguajnë për zgjedhjen e vendit, përveç rasteve kur udhëtojnë me fëmijë nga 2 deri në 11 vjeç, të cilët duhet të shoqërohen nga të paktën një prind ose kujdestar.
Për të garantuar që prindërit të ulen pranë fëmijëve, kompania aplikon një tarifë të quajtur “mandatory family seat”, e cila zakonisht kushton rreth 8 paund për çdo fluturim dhe zbatohet si për udhëtimin vajtje, ashtu edhe për kthimin.
Autoriteti britanik njoftoi se po heton nëse kjo tarifë përbën një praktikë të padrejtë ndaj konsumatorëve dhe nëse bie ndesh me ligjin për mbrojtjen e tyre. Sipas CMA, Ryanair është e vetmja kompani që operon nga Britania e Madhe që aplikon një tarifë të tillë për familjet.
Ryanair e ka cilësuar hetimin si “të pavend” dhe ka deklaruar se politika e saj e vendeve është në përputhje të plotë me ligjin. Kompania këmbëngul se nuk tarifon fëmijët për t’u ulur pranë prindërve dhe se mjafton që një i rritur të paguajë një vend të rezervuar për të siguruar vende falas pranë tij për deri në katër fëmijë në të njëjtin rezervim.
Hetimi pritet të zgjasë deri në gjashtë muaj. Nëse konstatohet shkelje e ligjit për mbrojtjen e konsumatorit, CMA mund të vendosë ndaj Ryanair një gjobë deri në 10% të xhiros globale të kompanisë.
Kjo nuk është hera e parë që Ryanair përballet me kundërshtime për politikën e vendeve familjare. Në vitin 2024, kompania humbi një apel kundër ndalimit të tarifave shtesë për uljen pranë fëmijëve nën 12 vjeç dhe pasagjerëve me aftësi të kufizuara.
