Saranda është renditur në krye të katër destinacioneve më të lira bregdetare në Evropë për verën e vitit 2026.
Me ardhjen e sezonit veror, shumë prej destinacioneve më të njohura turistike të Evropës, si bregdeti i Amalfit në Itali apo ishulli grek i Santorinit, vazhdojnë të tërheqin vëmendjen e turistëve nga e gjithë bota.
Megjithatë, sipas revistës së udhëtimeve “Travel Off Path”, pushimet verore në Evropë nuk duhet domosdoshmërisht të shoqërohen me shpenzime të mëdha.
Revista ka renditur katër destinacione bregdetare që ofrojnë ujëra të kristalta, atmosferë të gjallë, trashëgimi historike dhe çmime të përballueshme.
Në krye të listës përmendet Saranda, ndërsa pjesë e renditjes janë gjithashtu Qiproja Veriore, Varna në Bullgari dhe Kalymnos në Greqi.
Sipas artikullit, Saranda mund të mos jetë më “sekreti i fshehur” që ishte dikur, pasi bregdeti shqiptar po tërheq gjithnjë e më shumë turistë ndërkombëtarë dhe në disa zona po përjeton flukse të ngjashme me ato të destinacioneve të njohura në Itali apo Kroaci.
Megjithatë, qyteti vazhdon të ofrojë një raport shumë të favorshëm mes cilësisë dhe kostos së pushimeve.
Në Ksamil, një nga plazhet më të njohura pranë Sarandës, vizitorët mund të gjejnë rërë të bardhë dhe ujëra të kthjellëta që krahasohen shpesh me ato të Karaibeve apo Maldiveve.
Një paketë plazhi, që zakonisht përfshin një çadër dhe dy shezlongë, mund të kushtojë rreth 10 dollarë për gjithë ditën.
Në qendër të Sarandës, e njohur për shëtitoren e gjatë buzë detit dhe atmosferën e saj të gjallë, një sanduiç kushton rreth 5 dollarë, ndërsa një vakt me tre pjata në restorante të kategorisë mesatare, kushton nga 40 deri në 55 dollarë për dy persona.
Edhe akomodimi konsiderohet i përballueshëm. Turistët mund të gjejnë dhoma në hotele ekonomike ose bujtina për rreth 20 dollarë nata, ndërsa qëndrimi në apartamente apo struktura më luksoze buzë detit kushton mesatarisht rreth 120 dollarë nata.
Një tjetër pikë tërheqëse e zonës mbetet Parku Kombëtar i Butrintit, ku ruhen mbetjet e një qyteti të lashtë greko-romak me histori mijëravjeçare.
Kompleksi arkeologjik përfshin monumente të rëndësishme, mes tyre edhe një amfiteatër pjesërisht të fundosur.
Sipas “Travel Off Path”, bileta e hyrjes kushton rreth 11 dollarë, një çmim dukshëm më i ulët krahasuar me vende të ngjashme historike në rajon.
Artikulli ndalet edhe te siguria, një aspekt që shpesh ngre pikëpyetje për turistët që nuk e njohin mirë Shqipërinë.
Sipas revistës, Shqipëria klasifikohet në Nivelin 2 të këshillave të udhëtimit të Departamenti Amerikan i Shtetit (DASH), i njëjti vlerësim që u jepet vendeve si Italia dhe Franca.
Gjithashtu, vendi vlerësohet me 83 nga 100 pikë në Indeksin e Sigurisë së Udhëtarëve, një rezultat që konsiderohet i kënaqshëm për turistët ndërkombëtarë./skywweb.al
