Shoqata Ndërkombëtare e Transportit Ajror (IATA) po merr në konsideratë masa më të forta për pasagjerët që marrin bagazhet gjatë evakuimeve emergjente, përfshirë edhe bllokimin e hapësirave të bagazheve mbi sedilje.
Diskutimi vjen pas një studimi të ri që zbuloi se 4 në 10 pasagjerë nuk do t’i linin bagazhet pas në rast emergjence, pavarësisht rrezikut që kjo sjell për sigurinë e të gjithë personave në bord.
Për të ndryshuar këtë sjellje, IATA ka nisur fushatën “Save a Life, Not a Bag” (Shpëto një jetë, jo një çantë), e cila u bën thirrje udhëtarëve të braktisin çdo send personal dhe të drejtohen menjëherë drejt daljes më të afërt në rast evakuimi.
“Në fillim do të përpiqemi të edukojmë pasagjerët dhe të shohim nëse kjo ndryshon sjelljen e tyre. Nëse nuk shohim rezultatet që presim, mund të na duhet të marrim masa më drastike”, deklaroi Nick Careen, zëvendëspresident i lartë i IATA-s për operacionet, sigurinë dhe mbrojtjen.
Sipas tij, një nga opsionet që po shqyrtohen është vendosja e mekanizmave që bllokojnë automatikisht hapësirat e bagazheve gjatë emergjencave, duke i bërë të pamundura për t’u hapur.
Studimi tregoi gjithashtu se, megjithëse 80% e pasagjerëve besojnë se dinë si të veprojnë në një emergjencë, vetëm 61% janë të vetëdijshëm se rregulli kryesor është të lënë gjithçka pas.
IATA paralajmëron se edhe vonesa prej pak sekondash nga një ose dy pasagjerë që përpiqen të marrin bagazhet mund të rrezikojë jetën e njerëzve të tjerë në bord. Organizata këshillon gjithashtu që pasagjerët të mos përdorin telefonat për të filmuar apo fotografuar gjatë emergjencave dhe të mbajnë të lira korridoret dhe daljet e avionit.
Fushata mbështetet nga Agjencia Evropiane e Sigurisë së Aviacionit (EASA) dhe Administrata Federale e Aviacionit e SHBA-së (FAA).
