Shqipëria është kthyer në tregun me rritjen më të fortë të fluturimeve komerciale në Europë krahasuar me periudhën para pandemisë.
Sipas të dhënave për muajin maj 2026, numri i fluturimeve komerciale në Shqipëri është rritur me 208.2% në raport me majin e periudhës para Covid-19. Kjo është rritja më e lartë në kontinent dhe e vendos Shqipërinë shumë larg vendeve të tjera europiane për nga ritmi i zgjerimit të trafikut ajror.
E thënë ndryshe, trafiku ajror komercial në Shqipëri është më shumë se trefishuar krahasuar me nivelin para pandemisë. Kjo rritje lidhet me zgjerimin e shpejtë të turizmit, shtimin e linjave direkte, hyrjen e kompanive me kosto të ulët dhe rritjen e kërkesës për udhëtime drejt vendit.
Pas Shqipërisë, ndër vendet me rritjen më të lartë renditet Islanda, me 102.8%. Në rajon, Bosnje-Hercegovina ka regjistruar rritje me 66.7%, Serbia me 48.4%, Maqedonia e Veriut me 30.7% dhe Mali i Zi me 27.6%. Turqia rezulton me rritje prej 17.7%.
Të dhënat tregojnë se Ballkani është ndër zonat ku trafiku ajror është zgjeruar më shpejt pas pandemisë, i nxitur nga turizmi, rritja e mobilitetit dhe lidhjet më të shumta ajrore me tregjet europiane.
Ndërkohë, në Bashkimin Europian rikuperimi ka qenë shumë më i ngadaltë. Mesatarisht, numri i fluturimeve komerciale në BE është vetëm 0.5% mbi nivelin e para pandemisë.
Megjithatë, disa destinacione turistike kanë kaluar ndjeshëm shifrat e vitit 2019. Malta ka shënuar rritje prej 44.3%, Polonia 29.3%, Greqia 27.2%, Hungaria 20.1%, ndërsa Italia dhe Spanja kanë regjistruar secila rritje me 19%.
Rritje të tjera janë shënuar edhe në Portugali me 16.3%, Qipro me 16%, Kroaci me 13.8%, Irlandë me 11.7% dhe Rumani me 8.1%.
Nga ana tjetër, një pjesë e vendeve europiane vijojnë të kenë më pak fluturime se në periudhën para pandemisë. Rëniet më të forta janë regjistruar në Letoni me 28.6%, Slloveni me 27.9%, Suedi me 26.9%, Finlandë me 20.1%, Gjermani me 16.2% dhe Austri me 13.4%.
Edhe tregje të mëdha si Mbretëria e Bashkuar, Holanda dhe Norvegjia mbeten ende nën nivelin e majit para pandemisë.
Performanca e Shqipërisë tregon një ndryshim të fortë të hartës së aviacionit në vend. Në pak vite, tregu shqiptar ka kaluar nga një treg relativisht i vogël rajonal në një nga destinacionet me zgjerimin më të shpejtë të fluturimeve në Europë.
Rritja e fluturimeve sjell më shumë turistë, më shumë lidhje direkte dhe më shumë aktivitet për ekonominë, por njëkohësisht rrit presionin mbi kapacitetet aeroportuale, transportin tokësor, shërbimet turistike dhe infrastrukturën pritëse.
Me një rritje prej 208.2%, Shqipëria nuk është thjesht në fazë rikuperimi pas pandemisë, por në një cikël të ri zgjerimi të trafikut ajror, ku turizmi dhe lidhjet me Europën po bëhen një nga motorët kryesorë të ekonomisë.
