Gratë në Shqipëri janë dukshëm më të ekspozuara se burrat ndaj punës pa pagesë në biznesin e familjes.
Sipas raportit të INSTAT “Tregu i Punës 2025”, 29.3% e grave të punësuara rezultojnë punëtore pa pagesë në biznesin familjar, ndërsa tek burrat kjo përqindje është 14.4%.
Kjo do të thotë se gratë kanë rreth dy herë më shumë gjasa se burrat të jenë të përfshira në punë familjare pa pagesë.
Të dhënat nxjerrin në pah një nga problematikat më të forta të tregut të punës në vend, ku një pjesë e konsiderueshme e grave kontribuojnë në aktivitetet ekonomike të familjes, por pa marrë pagë të drejtpërdrejtë.
Ky fenomen është veçanërisht i lidhur me strukturën e punësimit në bujqësi dhe bizneset familjare, ku puna e grave shpesh konsiderohet si ndihmë për familjen dhe jo si punësim i paguar.
Raporti tregon se, në total, 21.1% e të punësuarve në vend janë punëtorë pa pagesë në biznesin familjar, ndërsa pjesa tjetër ndahet mes të punësuarve me pagë dhe të vetëpunësuarve.
Në vitin 2025, 48% e të punësuarve janë me pagë, ndërsa 30.9% janë të vetëpunësuar.
Diferenca mes grave dhe burrave në punën pa pagesë tregon se pabarazitë gjinore në tregun e punës nuk lidhen vetëm me pagat apo nivelin e punësimit, por edhe me mënyrën se si vlerësohet puna brenda familjes.
Pavarësisht rritjes së pjesëmarrjes së grave në tregun e punës, të dhënat tregojnë se ato vijojnë të mbajnë një barrë më të madhe në aktivitetet familjare të papaguara.
Ky realitet ndikon drejtpërdrejt në të ardhurat, sigurimet shoqërore dhe pavarësinë ekonomike të grave, sidomos në zonat rurale.
