Ndërhyrjet e kryera në zonën e Bënjës në Përmet dyshohet se kanë ndryshuar rrjedhën natyrore të ujërave termale, duke shkaktuar shqetësim te banorët dhe vizitorët.
Në kulmin e sezonit turistik, disa prej vaskave kurative kanë mbetur me nivel shumë të ulët uji, ndërsa Vaska e Lëkurës është boshatisur plotësisht. Pamja aktuale është krejt ndryshe nga ajo që vizitorët kanë njohur ndër vite në këtë destinacion.
Punimet janë realizuar nga kompania “Ersi SHPK”, e kontraktuar nga Fondi Shqiptar i Zhvillimit. Situata ka ngritur pikëpyetje nëse ndërhyrjet kanë cenuar burimet termale, ndërsa investimi po shkon drejt përfundimit.
Rreziku është që Bënja të humbasë pikërisht pasurinë natyrore që e ka kthyer në një nga destinacionet më të vizituara turistike në vend.
