Një studim i ri ka zbuluar se njerëzit nën moshën 50 vjeç po përjetojnë një proces të përshpejtuar të plakjes biologjike krahasuar me brezat e mëparshëm, një fenomen që sipas studiuesve mund të lidhet me rritjen e rasteve të kancerit tek të rinjtë.
Studimi, i publikuar në revistën Nature, analizoi ndryshimet biologjike ndërmjet brezave dhe zbuloi se personat e lindur në vitet 1965–1974 kanë një moshë biologjike më të lartë sesa ata të lindur në fillim të viteve 1950. E njëjta prirje u vu re edhe tek individët e lindur në vitet 1990, të cilët rezultuan të plaken biologjikisht më shpejt se brezi i lindur në fund të viteve 1960.
Sipas autores së studimit, Yin Cao, këto ndryshime mund të shfaqen shumë më herët nga sa është menduar deri më tani dhe mund të ndihmojnë në shpjegimin e shtimit të rasteve të kancerit me fillim të hershëm.
Edhe pse kanceri është konsideruar tradicionalisht një sëmundje e moshës së tretë, diagnozat tek personat nën 50 vjeç janë rritur ndjeshëm gjatë dekadave të fundit. Sipas të dhënave të cituara në studim, rastet e reja globale në këtë grupmoshë janë rritur me 79% që nga viti 1990. Në të njëjtën kohë është vërejtur një rritje edhe e kancerit tek fëmijët dhe adoleshentët.
Shkencëtarët theksojnë se shkaqet e këtij fenomeni nuk janë ende të qarta. Mes faktorëve që po hetohen janë konsumimi i ushqimeve ultra të përpunuara, obeziteti, alkooli, duhanpirja dhe ekspozimi ndaj mikroplastikës. Megjithatë, studiuesit sqarojnë se kërkimi nuk provon se plakja biologjike e përshpejtuar shkakton drejtpërdrejt kancerin, por tregon një lidhje të fortë mes këtyre dy fenomeneve.
