Shoqatat më të mëdha të aviacionit në Europë i kanë bërë thirrje Komisionit Europian të lejojë pezullimin e përkohshëm të sistemit të ri biometrik të kontrollit kufitar (EES) gjatë sezonit veror, duke shpjeguar se zbatimi i tij po shkakton vonesa të mëdha dhe probleme serioze në aeroporte.
Në një letër të hapur drejtuar presidentes së Komisionit Europian, Ursula von der Leyen, organizatat ACI Europe, Airlines for Europe (A4E) dhe IATA kërkojnë që shtetet anëtare të kenë mundësi të pezullojnë përkohësisht sistemin kur fluksi i pasagjerëve tejkalon kapacitetet e kontrollit kufitar.
Sipas tyre, që prej zbatimit të plotë të sistemit në prill, pritjet në kontrollet kufitare kanë arritur deri në 5 orë, duke shkaktuar vonesa fluturimesh, humbje lidhjesh, ndërsa në disa raste avionët janë detyruar të nisen me vende bosh pasi pasagjerët kanë mbetur në radhë.
Industria paralajmëron se situata mund të përkeqësohet gjatë korrikut dhe gushtit, kur aeroportet europiane pritet të përballojnë rreth 40 milionë pasagjerë më shumë se në dy muajt e mëparshëm.
Sipas letrës, problemet nuk kufizohen vetëm në aeroportet e mëdha, por prekin edhe destinacionet turistike, ku pasagjerët në disa raste presin jashtë terminaleve për shkak të mbingarkesës së pikave kufitare.
Organizatat theksojnë se nuk kërkojnë heqjen e kontrolleve kufitare, por rikthimin e përkohshëm te procedurat tradicionale me vulosje të pasaportave, deri sa sistemi biometrik të funksionojë pa krijuar bllokime.
Deri më tani, Komisioni Europian nuk ka marrë një vendim për pezullimin e sistemit, ndërsa kërkesa mbetet në shqyrtim. /skyweb.al
