Drejtoria e Hetimit Tatimor ka trajtuar 509 raste të dyshuara për mashtrim tatimor, duke tejkaluar para afatit objektivin e vendosur në Axhendën e Reformave.
Sipas Drejtorisë së Përgjithshme të Tatimeve, objektivi parashikonte hetimin e 500 rasteve deri në qershor të vitit 2027, por ky numër është kaluar më herët.
Nga 509 çështje të trajtuara deri më tani, 416 janë përfunduar, ndërsa 93 të tjera vijojnë të jenë në proces aktiv hetimi dhe verifikimi.
Tatimet e cilësojnë këtë rezultat si tregues të forcimit të kapaciteteve të Administratës Tatimore në luftën kundër evazionit dhe skemave të mashtrimit fiskal.
“Rezultatet flasin. Drejtoria e Hetimit Tatimor përmbushi përpara afatit objektivin e Axhendës së Reformave në luftën kundër mashtrimit tatimor”, thuhet në njoftimin e institucionit.
Sipas Administratës Tatimore, arritja dëshmon efektivitetin e masave të ndërmarra, veçanërisht nga strukturat e specializuara të hetimit tatimor, në parandalimin, zbulimin dhe hetimin e rasteve të dyshuara.
Forcimi i hetimit tatimor shihet si pjesë e përpjekjeve për të goditur subjektet që shmangin detyrimet, fshehin të ardhurat apo përdorin skema fiktive për të ulur pagesat ndaj buxhetit të shtetit.
Tatimet bëjnë me dije se verifikimet do të vijojnë për çështjet ende në proces, me synim rritjen e goditjes ndaj mashtrimit tatimor dhe forcimin e disiplinës fiskale.
