Kompanitë Bolv Oil e biznesmenit Behar Çukaj , Albstar e Idajet Ismailajt, Q.Sinaj e Qemal Sinajt apo Phoenix e Simmons vlerësohen si përfituesit kryesorë nga afera Bankers Petroleum
Prokuroria e Fierit ka bërë publike këtë të enjte detajet e një operacioni të gjerë hetimor që godet njërën nga skemat më të mëdha të dyshuara për mashtrim ekonomik në Shqipëri.
Në qendër të hetimeve ndodhet kompania “Bankers Petroleum Albania Ltd”, e cila për dy dekada ka shfrytëzuar rezervat e naftës në vend, pa paguar asnjë qindarkë tatim mbi fitimin.
Nga 14 urdhër-arrestet e lëshuara, janë ekzekutuar deri tani 9 masa sigurie me ndalime, ndërsa 5 shtetas të tjerë janë shpallur në kërkim. Në pranga kanë rënë edhe CEO aktual i kompanisë, Hongping Xiao, si dhe ish-drejtori i saj Leonard Çobo, së bashku me drejtues të tjerë financiarë dhe menaxherialë.
Ata akuzohen për veprat penale:
-
“Krijimi i skemave mashtruese lidhur me tatimin mbi vlerën e shtuar”,
-
“Fshehja e të ardhurave”,
-
“Pastrimi i produkteve të veprës penale ose veprimtarisë kriminale”,
-
“Shpërdorimi i detyrës”,
-
“Moskryerja e detyrave nga organet tatimore”.
Sipas hetimeve, “Bankers Petroleum” ka deklaruar në mënyrë fiktive humbje çdo vit nga 2004 deri më 2024, duke i shkaktuar buxhetit të shtetit dëme që dyshohet të kapin vlerën e qindra milionë eurove, ndërkohë që ka nxjerrë dhe tregtuar naftë në sasi të mëdha në zonën Patos-Marinëz-Fier.
Kapitali ka zbardhur disa nga pistat kryesore ku mendohet se janë kanalizuar fitimet e padeklaruara të Bankers përmes kontratave nënkontraktuese me kompani të tjera, duke shmangur detyrimet tatimore përmes zhvendosjes së fitimit.
Shkrimi:
Që Bankers ka shmangur taksa dhe ka bërë evazion, ky është një sekret publik në Shqipëri. Puna është: a e ka vullnetin prokuroria të gjejë se kush i mori lekët e taksave të shqiptarëve?
Një kanal se si i vodhën është ai i nënkontraktorëve.
Hetimi duhet t’u përgjigjet pyetjeve të mëposhtme:
Sa para ka marrë Bolv Oil nga kontratat e Bankers?
Sa prej tyre janë bërë me tender?
Sa ka qenë diferenca mes çmimit të paguar dhe vlerës reale të prokurimit?
Sa tatim fitimi është shmangur duke e zhvendosur fitimin nga Bankers, ku duhet të taksohej me 50 për qind, tek Behar Çukaj , që taksohej me 15 për qind?
Pasi të nxjerrin këto përgjigje, të shkojnë te rezidenca Tulipan, ah si e ka ajo atje, dhe të marrin paratë për t’ia kthyer popullit.
Më tutje:
Sa para ka marrë Albstar e Idajet Ismailaj nga kontratat e Bankers?
Sa prej tyre janë bërë me tender?
Sa ka qenë diferenca mes çmimit të paguar dhe vlerës reale të prokurimit?
Sa është tatimi i shmangur nga zhvendosja e fitimit nga Bankers te Albstar?
Pasi të ketë nxjerrë këto përgjigje, të shkojë te Pika e Vogël e Kumbaros ose te Stadiumi i Dukës dhe të marrë paratë që i janë rrëmbyer popullit.
Më tej akoma, të njëjtat pyetje janë për Simmons, Q. Sinaj, Phoenix, etj. etj. Aty janë një pjesë e mirë e taksave të shmangura.
