Turizmi në Shqipëri rritet, por mbetet i varur nga korriku dhe gushti Turizmi në Shqipëri shënoi rritje edhe gjatë vitit 2025, me më shumë vizitorë dhe netqëndrime në hotele, bujtina dhe struktura të tjera akomoduese.
Sipas të dhënave, gjatë vitit të kaluar u regjistruan rreth 9.7 milionë netqëndrime turistike në vend.
Megjithatë, fluksi vijon të jetë shumë i përqendruar në sezonin veror. Eurostat vlerëson se Shqipëria është ndër vendet më sezonale në Evropë për turizmin.
Vetëm gjatë muajve korrik dhe gusht u realizuan 42.42% e të gjitha netqëndrimeve të vitit.
Ky nivel e vendos Shqipërinë në vendin e parë në Ballkanin Perëndimor për përqendrimin e turizmit në dy muajt e verës. Pas saj renditet Mali i Zi me 40.5%, ndërsa Maqedonia e Veriut ka 28.9%.
Kosova dhe Serbia kanë shpërndarje më të balancuar, me përkatësisht 23% dhe 21.6% të netqëndrimeve në korrik-gusht. Në Bashkimin Europian, mesatarja e netqëndrimeve në dy muajt kryesorë të verës ishte 31.1%.
Sezonaliteti më i lartë në BE u regjistrua në Kroaci, me 54.5%, e ndjekur nga Bullgaria me 43.4% dhe Greqia me 41.6%. Të dhënat tregojnë se sfida kryesore për Shqipërinë mbetet shtrirja e sezonit turistik përtej verës. /skyweb.al
