Shqipëria pritet të shënojë sot një tjetër hap në procesin e integrimit europian, me mbylljen e tre kapitujve të parë të negociatave për anëtarësim në Bashkimin Evropian.
Vendimi pritet të formalizohet gjatë Konferencës së nëntë Ndërqeveritare Shqipëri-BE, e cila do të zhvillohet në Bruksel.
Delegacioni shqiptar do të kryesohet nga kryeministri Edi Rama, ndërsa kapitujt që pritet të mbyllen janë kapitulli 25, “Shkenca dhe Kërkimi”, kapitulli 26, “Arsimi dhe Kultura”, si dhe kapitulli 30, “Marrëdhëniet me Jashtë”.
Në këto tri fusha, Shqipëria konsiderohet se ka arritur nivelin e kërkuar të harmonizimit me legjislacionin dhe standardet e Bashkimit Evropian.
Konferenca Ndërqeveritare do të nisë në orën 19:00, ndërsa në orën 20:00 është parashikuar një konferencë për shtyp, ku pritet të bëhet një bilanc i ecurisë së negociatave.
Mbyllja e kapitujve vjen pas përmbushjes së piketave të ndërmjetme, të njohura si IBAR, të cilat përbëjnë një etapë të rëndësishme në procesin e anëtarësimit.
Pas këtij hapi, Shqipërisë do t’i duhet të plotësojë kushtet për mbylljen e 30 kapitujve të tjerë. Objektivi i qeverisë shqiptare është që procesi teknik i negociatave të përfundojë brenda vitit 2027.
Megjithatë, përfundimi i negociatave nuk nënkupton automatikisht anëtarësimin në Bashkimin Evropian. Vendimi për pranimin e Shqipërisë do të jetë politik dhe do të kërkojë miratimin unanim të të 27 shteteve anëtare.
