Debate të forta u regjistruan në Komisionin për Çështjet Ligjore dhe Administratën Publike gjatë shqyrtimit të ndryshimeve në ligjin “Për mbrojtjen e tokës bujqësore”.
Përplasja lidhej me lejimin e instalimit të impianteve eolike në tokat bujqësore dhe me pasojat që mund të sjellin strukturat e tyre mbi sipërfaqen e tokës.
Deputeti i Partisë Demokratike, Oerd Bylykbashi, kundërshtoi ndryshimet, duke argumentuar se turbinat e erës kërkojnë shpime të thella dhe baza të mëdha betoni, të cilat mund ta dëmtojnë tokën bujqësore.
Të njëjtin shqetësim ngriti edhe deputeti socialist Damian Gjiknuri, i cili votoi kundër nenit të parë të projektligjit, së bashku me dy deputetët e opozitës.
Përfaqësuesit e administratës pohuan se strukturat e impianteve do të vendoseshin drejtpërdrejt në tokë, pa platforma betoni. Gjiknuri e kundërshtoi këtë shpjegim, duke thënë se një kullë eolike me lartësi rreth 100 metra nuk mund të qëndrojë pa themele betoni.
“Që të vësh një kullë për ‘wind farm’, është 100 metra e lartë dhe nuk ka shans të vendoset pa strukturë betoni. Bëhet fjalë për kulla shumë të larta. Nuk jam i bindur me shpjegimet tuaja”, deklaroi ai.
Debati u përshkallëzua në fund të mbledhjes, kur deputeti demokrat Gent Strazimiri kërkoi të vijonte me pyetjet, por kryetari i komisionit, Ulsi Manja, deklaroi se diskutimet ishin ezauruar.
Strazimiri paralajmëroi se përfshirja e termit “eolik” në projektligj mund të krijonte mundësi abuzimi në të ardhmen dhe akuzoi shumicën se po nxitonte miratimin pa sqaruar paqartësitë.
“Në rregull, e gjetët lepurin në ferrë ju të tre”, iu përgjigj Manja, duke iu referuar Bylykbashit, Strazimirit dhe Gjiknurit.
Gjiknuri kërkoi sërish fjalën, por Manja e hodhi projektligjin në votim dhe e konsideroi votën e tij si abstenim.
“Do më jepni fjalën apo të largohem fare?”, pyeti Gjiknuri.
“Mund të ikësh, rri te abstenimi ti. Merru me Oerdin”, iu përgjigj Manja.
Pas kësaj përplasjeje, Damian Gjiknuri deklaroi se do të largohej dhe braktisi mbledhjen e komisionit. /skyweb.al
