Dhjetëra banorë të fshatrave të zonës naftëmbajtëse Patos-Marinzë protestuan këtë të mërkurë përpara zyrave të kompanisë Bankers Petroleum, duke kërkuar pagesën e qirave të tokave që përdoren nga kompania.
Sipas banorëve, rreth 800 familje nga fshatrat Marinëz, Belinë, Sheqishte, Zharrëz, Kallm, Frashër dhe Kuman nuk kanë marrë pagesat që prej fillimit të vitit 2026.
Tokat e tyre përdoren nga kompania për rrugë, parkingje, sheshe dhe puse nafte, ndërsa marrëdhënia kontraktuale, sipas protestuesve, vijon prej vitit 2010.
Banorët kërkojnë zbatimin e kontratave ekzistuese dhe kundërshtojnë ndryshimin e tyre nga njëvjeçare në dyvjeçare. Ata kundërshtojnë gjithashtu uljen e çmimit të qirasë nga 400 lekë për metër katror në 200 lekë.
Protestuesit paralajmëruan se, nëse kërkesat e tyre nuk merren parasysh, do të kërkojnë rikthimin e tokave në gjendjen e mëparshme dhe do të përshkallëzojnë protestat.
Për shumë familje të zonës naftëmbajtëse, pagesa vjetore e qirasë së tokës përbën një nga burimet kryesore të të ardhurave. /skyweb.al
