Shqipëria renditet e dyta në Evropë për përqindjen e banesave të pajisura me kondicionerë, sipas një harte krahasuese të publikuar nga Geo Mapped mbi përdorimin e sistemeve të ftohjes në vendet evropiane.
Sipas të dhënave, 68% e banesave në Shqipëri kanë kondicioner, duke u pozicionuar menjëherë pas Greqisë, e cila kryeson me 85%.
Pas Shqipërisë renditen vende si Spanja (63%), Rumania (55%), Kroacia (50%), Italia (48%) dhe Turqia (40%).
Në anën tjetër të renditjes ndodhen vendet e Evropës Veriore dhe Qendrore, ku përdorimi i kondicionerëve mbetet shumë i ulët. Vetëm 2% e banesave në Norvegji, 3% në Suedi, 4% në Gjermani dhe 5% në Mbretërinë e Bashkuar janë të pajisura me sisteme ftohjeje.
Harta tregon një ndarje të qartë klimatike në Evropë, ku vendet e jugut dominojnë për përdorimin e kondicionerëve për shkak të temperaturave më të larta gjatë verës, ndërsa në veri nevoja për to ka qenë tradicionalisht më e kufizuar.
Sipas ekspertëve, valët e shpeshta të të nxehtit të viteve të fundit pritet të rrisin më tej përdorimin e kondicionerëve edhe në vendet e Evropës Veriore.
