Kryeministri Edi Rama ka thirrur sot në një mbledhje të përbashkët anëtarët e qeverisë dhe grupin parlamentar të Partisë Socialiste.
Në takim, kreu i qeverisë pritet të mbajë një fjalim, ndërsa deputetët nuk janë informuar paraprakisht për përmbajtjen e tij.
Burime për Skyweb.al bëjnë me dije se edhe brenda grupit socialist ka pritshmëri për ndryshime të mundshme në kabinet.
Këto pritshmëri lidhen me klimën e krijuar pas protestave dhe me nevojën për një reagim politik nga mazhoranca. Megjithatë, deri tani nuk ka asnjë konfirmim zyrtar se Rama do të shpallë sot shkarkime apo emërime ministrash.
Një mbrëmje më parë, kryeministri publikoi një pjesë të fjalimit të tij, ku u drejtohej protestuesve.
Ky fragment ka shtuar më tej pikëpyetjet mbi mesazhin që Rama do të japë sot para ministrave dhe deputetëve socialistë. Mbetet për t’u parë nëse mbledhja do të prodhojë ndryshime konkrete në qeveri apo vetëm një qëndrim politik ndaj protestave. /skyweb.al
