Propozimi i Komisionit Europian për të hapur negociatat me Shqipërinë për eliminimin e tarifave shtesë të roaming-ut me vendet e Bashkimit Europian pritet të sjellë një ndryshim të drejtpërdrejtë për përdoruesit shqiptarë të telefonisë celulare.
Nëse marrëveshja finalizohet, abonentët do të mund të kryejnë telefonata, të dërgojnë mesazhe dhe të përdorin internetin në vendet e BE-së me të njëjtat tarifa që paguajnë brenda Shqipërisë.
Kjo do të thotë fatura më të ulëta për qytetarët që udhëtojnë shpesh për punë, studime apo turizëm, duke eliminuar kostot e larta që aktualisht lidhen me përdorimin e të dhënave dhe thirrjeve jashtë vendit.
Ndryshimi pritet të ndikojë pozitivisht edhe te bizneset, të cilat do të kenë komunikim më të lirë dhe më të parashikueshëm me partnerët në tregun europian, raporton skyweb.al.
Heqja e roamingut do të formalizojë gjithashtu një regjim të unifikuar tarifash, duke kaluar nga ofertat e pjesshme apo promocionale në një sistem të qëndrueshëm dhe të rregulluar sipas modelit “Roam Like at Home”.
Ky mekanizëm zbatohet prej vitesh brenda BE-së dhe konsiderohet një nga përfitimet më të prekshme për qytetarët.
Nga ana politike dhe ekonomike, nisma shihet si një hap konkret i integrimit gradual të Shqipërisë në tregun digjital europian, duke sjellë përfitime praktike për qytetarët edhe përpara anëtarësimit të plotë në BE.
Puna për heqjen e Raomingut me vendet e Ballkanit Perëndimore nisi disa vite më parë kur Këshilli i Bashkëpunimit Rajonal drejtohej nga Majlinda Bregu. Pas heqjes së Roamingut mes vendeve të Ballkanit, tani jemi shumë pranë edhe tarifave më të ulëta me vendet e BE-së. /skyweb.al
