Punëdhënësit mund të përdorin inteligjencën artificiale dhe të dhënat personale të kandidatëve për të llogaritur sa është paga më e ulët që ata do të pranonin për një vend pune.
Ky fenomen po njihet si “pagat e mbikëqyrjes”. Në vend që paga të përcaktohet vetëm nga eksperienca, kualifikimet dhe niveli i tregut, algoritmet analizojnë edhe gjendjen personale dhe financiare të aplikantit.
Sistemet mund të marrin në shqyrtim të dhëna si borxhet, kreditë, zona ku banon kandidati, sjellja në internet apo vështirësitë e tij financiare.
Qëllimi është të kuptohet nëse personi ka nevojë urgjente për punë dhe, për këtë arsye, mund të pranojë një pagë më të ulët.
Për shembull, dy kandidatë me të njëjtën eksperiencë mund të marrin oferta të ndryshme. Kandidatit që rezulton më i rrezikuar financiarisht mund t’i ofrohet një pagë më e ulët, sepse algoritmi parashikon se ai ka më pak mundësi ta refuzojë.
Ekspertët paralajmërojnë se kjo praktikë mund të dëmtojë veçanërisht njerëzit me të ardhura të ulëta, borxhe apo probleme financiare.
Në shumë raste, kandidatët mund të mos e dinë se të dhënat e tyre personale po përdoren gjatë përcaktimit të pagës.
Përdorimi i këtyre sistemeve është vërejtur fillimisht në ekonominë e platformave, por mund të përhapet edhe në sektorë si tregtia, shëndetësia, call center-at dhe shërbimet ndaj klientit.
Sipas ekspertëve, kjo mënyrë e përcaktimit të pagave rrezikon të cenojë parimin e pagesës së barabartë për punë të barabartë dhe të krijojë diskriminim ndaj kandidatëve më të pambrojtur ekonomikisht./skyweb.al
